პარლამენტის თავმჯდომარე დავით უსუფაშვილი ზუგდიდში მომხდარ ინციდენტს ეხმაურება და ამბობს, რომ ქვეყანაში ძალადობა უნდა დასრულდეს.

ამის შესახებ უსუფაშვილმა ტელეკომპანია „მაესტროს“ ეთერში განაცხადა.

მისი თქმით, თუ ვინმე ფიქრობს, რომ მსგავსი მეთოდებით „ნაციონალური მოძრაობის“ რაიმე ღონისძიებას ხელს შეუშლიან, ცდებიან. უსუფაშვილი ფიქრობს, რომ სწორედ ამგვარი მოქმედებებია პოლიტიკური ოპონენტის ღონისძიების წარმატების წინაპირობა.

„ქვეყანაში ძალადობა და ეს უბედურება უნდა დამთავრდეს. წინააღმდეგ შემთხვევაში, უკან დაგვრჩება ყველა კარზე კაკუნი - ნატოზეც და ევროპაზეც, რადგან ნატოსა და ევროპაში ცივილიზებული სახელმწიფოს და საზოგადოებას გველიან. ნატოში მხოლოდ „ნაციონალურ მოძრაობას“ არ ელოდნენ და ეს იყო მათი შეცდომა, ევროკავშირსა და ნატოში მხოლოდ „ქართულ ოცნებას“ არ გველიან. ჩვენ იქ ყველას ერთად გველიან. უნდა დავინახოთ, რომ ამგვარი მოვლენები სანუკვარ მიზანს გვაშორებს“, - ამბობს უსუფაშვილი.