საქართველოს მთავარ პროკურორს გიორგი ბადაშვილს პარლამენტის პლენარულ სხდომაზე „თავისუფალი დემოკრატები“ იბარებენ.

ფრაქციის წევრებს ბადაშვილისგან სამართალწარმოების პროცესში ჩადენილი დანაშაულის გამოძიების დეპარტამენტის შესახებ უფრო ვრცელი და დეტალური ინფორმაციის მიღება სურს. „თავისუფალმა დემოკრატებმა“ შესაბამისი მოთხოვნა ბიუროს დღევანდელ სხდომაზე გააჟღერეს.

როგორც შალვა შავგულიძემ განმარტა, პროკურატურაში შექმნილი ახალი დეპარტამენტის შესახებ, დეპუტატებმა მისი პრეზენტაციის დროს შეიტყვეს, საიდანაც ახალი უწყების საქმიანობის შესახებ მხოლოდ მწირი ინფორმაცია გავრცელდა.

„გვაინტერესებს, ეს დეპარტამენტის მუშაობას როგორ აპირებს. პრეზენტაცია პრემიერმა და მთავარმა პროკურორმა მოახდინეს, თუმცა, არასრული ინფორმაცია იყო - ეს უნდა იყოს სამართლიანობის აღდგენა და არა ქონების შერჩევით გადანაწილება", - განაცხადა შავგულიძემ.

შეგახსენებთ, ცოტა ხნის წინ, მთავარ პროკურატურაში სამართალწარმოების პროცესში ჩადენილი დანაშაულის გამოძიების დეპარტამენტი შეიქმნა, რომელიც ორიენტირებული იქნება სამართალწარმოების მიმდინარეობისას და სასჯელის მოხდის პერიოდში ჩადენილი დანაშაულის გამოძიებაზე.