ომბუდსმენი ზუგდიდის ინციდენტის აღკვეთისას სამართალდამცავების არასათანადო ძალისხმევაზე საუბრობს

პოლიტიკა - 17:35, 16 Mar, 2015

1292

საქართველოს სახალხო დამცველი უჩა ნანუაშვილი ზუგდიდში მომხდარ ინციდენტთან დაკავშირებით შეშფოთებას გამოთქვამს. მისი თქმით ინციდენტის დროს განვითარებული მოვლენების შესწავლისას განსაკუთრებული ყურადღება სამართალდამცავთა როლს უნდა მიექცეს. ნანუაშვილის განცხადებით გამოკვლეული უნდა იქნას, რამდენად გამოიყენეს სამართალდამცავებმა მათ ხელთ არსებული ყველა საშუალება განვითარებული ძალადობრივი ქმედებების პრევენციის მიზნით.

მისი თქმით, მედია საშუალებებით გავრცელებულ ვიდეო კადრებში აშკარაა, რომ შემთხვევის ადგილზე სამართალდამცავთა საგრძნობი ნაკლებობაა, ხოლო, ის რამდენიმე პოლიციელი, რომელიც ადგილზე იმყოფებოდა, ვერ უზრუნველყოფდა მოძალადეთა შეკავებას და ძალადობრივი ქმედებების აღკვეთას.

როგორც ომბუდსმენის განცხადებაში ნათქვამი, დაწყებულია გამოძიება სისხლის სამართლის კოდექსის 118–ე მუხლით, თუმცა, გავრცელებული ვიდეო ჩანაწერების მიხედვით, შესაძლოა სახეზე იყოს სს კოდექსით გათვალისწინებული ისეთი დანაშაულების ჩადენა, როგორიცაა ბინაში ან სხვა მფლობელობაში მფლობელის ნების საწინააღმდეგოდ უკანონოდ შესვლა ძალადობით, ჯგუფურად, რომელიც არღვევს ბინის ან სხვა მფლობელობის ხელშეუხებლობას.

ნანუაშვილის თქმით, მნიშვნელოვანია, რომ გამოძიება დროულად და ეფექტურად ყოველგვარი გაჭიანურების გარეშე წარიმართოს და კანონით გათვალისწინებული შესაბამისი პასუხისმგებლობა ყველა დამნაშავე პირს დაეკისროს.

„გამოძიებისას ყურადღება უნდა გამახვილდეს იმაზეც, თუ რამ შეუშალა ხელი აქციის მიმდინარეობისას სამართლდამცავთა მობილიზებას იმისათვის, რომ დაპირისპირებულ მხარეებს შორის ფიზიკური ძალადობა არ მომხდარიყო. შეკრების/მანიფესტაციის უფლების ეფექტურად რეალიზებისთვის მნიშვნელოვანია სახელმწიფოს მხრიდან ქმედითი ნაბიჯების გადადგმა, მათ შორის დაპირისპირებული მხარეების დაშორიშორება, რათა მსგავს ძალადობას არ ჰქონდეს ადგილი“,- ნათქვამია ომბუდსმენის განცხადებაში.

სახალხო დამცველი ხაზგასმით აღნიშნავს, რომ აქციასა და ძალადობრივ ქმედებებში თუ მონაწილეობდნენ ადგილობრივი თვითმმართველობის ორგანოს წარმომადგენლები, ეს უნდა გახდეს შესწავლის საგანი, რადგან ინფორმაციის დადასტურების შემთხვევაში, აშკარაა, რომ მნიშვნელოვნად დაზარალდება საჯარო სამსახურის ერთ–ერთი ძირითადი პრინციპი, რომელიც მის პოლიტიკურ ნეიტრალობას გულისხმობს.

სახალხო დამცველი მოუწოდებს ადგილობრივი თვითმმართველობის მოხელეებს, გაიაზრონ საკუთარი პასუხისმგებლობა და ნუ ჩაებმებიან ისეთ ქმედებებში, რომლებიც მათ მიუკერძოებელ საქმიანობას ეჭვის ქვეშ დააყენებს.