უპასუხისმგებლო მერიას ერთად შევახსენებთ ფუნქციებს - ხარატიშვილმა მორიგი აქცია დააანონსა

პოლიტიკა - 16:06, 16 Mar, 2015

1560

პოლიტიკური გაერთიანება „სამოქალაქო ალიანსი თავისუფლებისათვის“ ლიდერი ზურაბ ხარატიშვილი აცხადებს, რომ მერია ცდილობს იპოთეკით დაზარალებულთა აქციის მონაწილეები ნაციონალური მოძრაობის წევრებად წარმოაჩინოს და მოთხოვნებზე პასუხის გაცემას ფორმალური მიზეზებით აარიდოს თავი.

„პარასკევს, 13 მარტს, თბილისის მერიამ იპოთეკური სესხებით დაზარალებული ადამიანების აქციასთან დაკავშირებით განცხადება გაავრცელა, სადაც აქციის მონაწილეები ნაციონალური მოძრაობის წევრებად მოიხსენია. მერია შეეცადა აგრეთვე დაზარალებულთა მოთხოვნებზე პასუხის გაცემის ვალდებულებისთვის ფორმალური მიზეზებით აერიდებინა თავი და განაცხადა, რომ მსგავსი საკითხების გადაწყვეტა მის კომპეტენციას არ განეკუთვნება.

ჩვენ, ამ აქციაში მონაწილე პოლიტიკურმა გაერთიანებამ გვინდა სიცხადე შევიტანოთ შექმნილ ვითარებაში და საზოგადოებას ვაცნობოთ, რომ საქმე ეხება ათასობით დაზარალებულ ადამიანს და ქ. თბილისის მერიის ფორმალურ-ბიუროკრატიული დამოკიდებულება მათთვის შეურაცხმყოფელია. ამ ადამიანებმა კარგად იციან საქართველოს კანონმდებლობა, მათ შორის თვითმმართველობის კოდექსი და მერიისგან იმას ითხოვენ რაც მის კომპეტენციას განეკუთვნება. როგორც ჩანს, ბ-ნ ნარმანიას არ აქვს ამ ადამიანებთან შეხვედრისა და ურთიერთობის სურვილი, სხვა შემთხვევაში შეხვდებოდა მათ და ადვილად გაერკვეოდა მოთხოვნების კანონზომიერებაში.

ამასთან, აშკარა და თვალშისაცემია ის ფაქტი, რომ მერია თავისი განცხადებით იპოთეკით დაზარალებულებისა და ე.წ. „ატსტუპნიკების“ მწვავე სოციალური პრობლემების პოლიტიზირებას ცდილობს და იმედი აქვს, რომ ამ გზით გაექცევა პასუხისმგებლობას. აქციის მონაწილეთა რომელიმე პარტიის მომხრეებად ან მოწინააღმდეგეებად გამოცხადება არის სრული პოლიტიკური სიბეცე, რადგან ეს პრობლემები ზეპარტიული პრობლემებია და მათი გადაწყვეტა დაზარალებულთა პოლიტიკურ სიმპათიებზე დამოკიდებული არ უნდა იყოს. როგორც ჩანს, ქალაქის მერიას ეს არ ესმის, რაც პრობლემას უფრო ამძიმებს.

გვინდა მოვუწოდოთ მერიას კარგად გაახილოს თვალი და აქციის მონაწილეთა შორის 2012 წლის არჩევნებისდროინდელ "ქართული ოცნების" კოორდინატორებსა და შტაბების უფროსებს დაინახავს. აშკარაა, რომ ხელისუფლება, არც ცენტრალური და არც ადგილობრივი, დაზარალებულთა პრობლემებით თავის შეწუხებას არ აპირებს, მაგრამ ეს პროცესი ვერ გაჩერდება, ვინაიდან ამ ხალხს დასაკარგი არაფერი აქვს.

ზემოთქმულიდან გამომდინარე, ჩვენ, პოლიტიკური გაერთიანება „სამოქალაქო ალიანსი თავისუფლებისათვის“, კვალავაც ვაპირებთ უსამართლოდ დაზარალებულთა მხარდამჭერას და პარასკევს, 20 მარტს, მონაწილეობას მივიღებთ მორიგი იპოთეკით დაზარალებულებისა და ე.წ. „ატსტუპნიკების“ საპროტესტო აქციაში, სადაც ერთად შევახსენებთ ქალაქის მერიას თავის ფუნქციებსა და პასუხისმგებლობას.“- ნათქვამია „სამოქალაქო ალიანსი თავისუფლებისათვის“მიერ გავრცელებულ განცხადებაში.

შეგახსენებთ, რომ იპოთეკით დაზარალებულმა პირებმა მერიის წინ აქცია გამართეს და დავით ნარმანიასგან მთავრობათან შუამდგომლობა მოითხოვეს.