მე ვარ კვოტების წინააღმდეგი, მაგრამ ვარ თანასწორობის მომხრე

მე ვარ კვოტების წინააღმდეგი, მაგრამ ვარ თანასწორობის მომხრე - დავით უსუფაშვილი

პოლიტიკა - 12:47, 16 Mar, 2015

1451

პარლამენტის თავმჯდომარის დავით უსუფაშვილის განცხადებით, ის მაღალ სახელმწიფო თანამდებობებზე მათ შორის საქართველოს პრეზიდენტად და პარლამენტის თავმჯდომარედ ქალების ყოფნას მიესალმება. აღნიშნული კომენტარი უსუფაშვილმა პრეზიდენტის განცხადების საპასუხოდ გააკეთა, რომელმაც აღნიშნა, რომ საქართველოს მე-5 პრეზიდენტად ქალის არჩევას მიესალმებოდა.

როგორც “რედისონში“ ქალთა პოლიტიკური მონაწილეობის საკითხებზე გამართული შეხვედრისას უსუფაშვილმა აღნიშნა, გადაწყვეტილების მიღების პროცესში ბალანსის დაცვა აუცილებელია.

„მინდა მივმართო ყველა თანამდებობის პირს, საკადრო გადაწყვეტილებებისას მათ დაიცვან ბალანსი. მე ვარ კვოტების წინააღმდეგი, მაგრამ ვარ თანასწორობის მომხრე. თუ ვხედავ, რომ კვოტების გარეშე ვერ მიიღწევა თანასწორობა, მაშინ ვხდები კვოტების მომხრე. დარწმუნებული ვარ, საჭიროა საკანონმდებლო დონეზე ამ კუთხით ნაბიჯების გადადგმა. ქალები პარლამენტში, არასამთავრობოებში და სხვადასხვა თანამდებობებზე მათი საქმიანობა არის ძალიან საჭირო.

მაგრამ პარლამენტში მეტი ქალი არ ნიშნავს ურეაგირებო მდგომარეობას. ეს ნიშნავს კატორღულ შრომაში მათ ჩაბმას. აუცილებელია, ცვლილებები საკანონმდებლო დონეზე და პოლიტიკურ პარტიათა შორის კონსულტაციები“ - განაცხადა უსუფაშვილმა.

პრეზიდენტის და პარლამენტის სპიკერის თანამდებობებზე ქალების არჩევის საკითხზე პრეზიდენტმა და პარლამენტის თავმჯდომარემ ხუმრობით რეპლიკებიც გაცვალეს :

პრეზიდენტმა აღნიშნულ საკითხზე პარლამეტის სპიკერს რიგგარეშე სესიის მოწვევა შესთაცაზა: "შემიძლია ამ თემაზე პარლამენტის რიგგარეშე სესია მოვიწვიო, თუკი საკითხის პარლამენტში გატანა გსურთ" - მიმართა მარგველაშვილმა უსუფაშვილს.

რის საპასუხოდაც უსუფაშვილმა პრეზიდენტს რიგგარეშე საპრეზიდენტო არჩევნები შეახსენა-"თქვენ ამისთვის რიგგარეშე საპრეზიდენტო არჩევნები დაგჭირდებათ, ამაზე უფრო იფიქრეთ და მაშინ ბევრ რამეზე შევთანხმდებით"- განაცხადა უსუფაშვილმა.

სასტუმრო „რედისონში“ ქალთა პოლიტიკური მონაწილეობის საკითხებზე შეხვედრა მიმდინარეობს. შეხვედრა პოლიტიკურ ცხოვრებაში ქალთა მონაწილეობის გაზრდას ისახავს მიზნად.

_{ნინო ზედგენიძე}