უზენაესი სასამართლოს თავმჯდომარეობის კანდიდატი ნინო გვენეტაძე ზაქარია ქუცნაშვილის კითხვებს პასუხობს. საპარლამენტო უმრავლესობის წევრმა გვენეტაძეს ცხრაპუნქტიანი კითხვებით გუშინ მიმართა. კითხვები, ძირითადად, ნინო გვენეტაძის სამოსამართლეო საქმიანობას ეხებოდა.

გვენეტაძის განცხადებით, ქუცნაშვილმა კონკრეტულ საქმეებთან დაკავშირებით, ანგარიში მოსთხოვა, რაც კონსტიტუციის დარღვევაა.

„მის მიერ დასმული ცხრა კითხვიდან, მხედველობაში მაქვს მე-5, მე- 6, მე-7 და მე- 8 კითხვა, მან პირდაპირ მოითხოვა კოლეგიალურად განხილულ საქმეებზე კომენტარებისა და შეფასებების გაკეთება, ანუ მომთხოვა ანგარიში კონკრეტულ საქმეებთან დაკავშირებით, რაც კონსტიტუციის დარღვევაა. ჩემი სამოსამართლეო საქმიანობის შესაფასებლად დეპუტატმა თვითშეზღუდვისა და თვითცენზურის კულტურის გარეშე საქართველოს კონსტიტუციის 84-ე მუხლის მესამე ნაწილით გათვალისწინებული იმპერატიული დათქმა - „არავის არ აქვს უფლება მოსამართლეს მოსთხოვოს ანგარიში კონკრეტულ საქმესთან დაკავშირებით“ - დაარღვია. ქუცნაშვილმა ჩრდილი მიაყენა ჩემი, როგორც იმდროინდელი მოსამართლის ავტორიტეტს და სასამართლოს მიუკერძოებლობას“, - განაცხადა გვენეტაძემ.
რაც შეეხება დანარჩენ კითხვებს, გვენეტაძე განმარტავს, რომ აღნიშნული საჯარო ინფორმაციაა, თუმცა რამდენიმეს მაინც უპასუხა.

„1999-დან 2005 წლამდე ვიყავი მოსამართლე და ამ პერიოდში კოლეგიური საქმის განხილვის წესით გამამართლებელი განაჩენი ათეულობით მაქვს გამოტანილი. იყო შემთხვევა, როცა საკასაციო პალატამ ჩემი მონაწილეობით თვით უვადო თავისუფლების აღკვეთილ მსჯავრდებული პირიც გაამართლა“, - განაცხადა გვენეტაძემ.

კითხვას იმათან დაკავშირებით, თუ ვინ გაუწია რეკომენდაცია უზენაესი სასამართლოს მოსამართლის კანდიდატურაზე, ნინო გვენეტაძემ უპასუხა, რომ მისი კანდიდატურის წარმდგენი მაშინდელი უზენაესი სასამართლოს თავმჯდომარე ლადო ჭანტურია იყო.

_{ნინო ზედგენიძე}