პრემიერის თქმით, მისთვის გაუგებარია ის აჟიოტაჟი, რაც ეკონომიკურ ვითარებასთან დაკაშირებით ოპოზიციის წარმომადგენლებმა ატეხეს.

ირაკლი ღარიბაშვილის თქმით, ისინი ქვეყნის ბედით დაინტერესებული არ არიან და ცდილობენ სიტუაცია დაძაბონ.

„გამაოგნებელია ის აჟიოტაჟი, რომელიც ჩვენმა ოპოზიციურმა ძალებმა ატეხეს. თუ ისინი რეალურად არიან დაინტერესებული ხალხის მდგომარეობით და განიცდიან პრობლემებს, მინდა მივმართო მათ, შეწყვიტონ აჟიოტაჟი. გუშინ ჩვენ ვიხილეთ, რომ პარლამენტში ძალიან ცივილურ ფორმებში შედგა საკომიტეტო მოსმენა. ეკონომიკისა და ფინანსთა მინისტრებმა ყველა კითხვას გასცეს პასუხი, ჩვენ მოვახსენეთ ჩვენი ხედვა, თუ როგორ უნდა გამოვიდეთ ამ მდგომარეობიდან. გასული წელი მართლაც პოზიტიური წელი იყო, მაგრამ წელს ჩვენ ვერ ვიქნებით გამონაკლისი, რადგან მთელ მსოფლიოში რთული ვითარებაა. ჩვენი როგორც პატარა ქვეყნის ეკონომიკა კი მიბმულია მსოფლიო ეკონომიკასთან. აქედან გამომდინარე, ჩვეულებრივი ფარისველობაა, რასაც ისინი აკეთებენ. ჯერ ორჯერ მოითხოვეს სხდომა, შემდეგ 2-ჯერ დანიშნეს თუ ვერ დანიშნეს. ეს ჩვეულებრივი ფარისევლობაა. ისინი არ არიან დაინტერესებულები ჩვენი ქვეყნის ბედით, მათი ამოცანაა, რომ კიდევ უფრო დაძაბონ არსებული ვითარება", - განაცხადა პრემიერმა.

ირაკლი ღარიბაშვილმა მედიასაც მიმართა და მოუწოდა ხელოვნურად ნუ შექმნიან ქაოსურ სიტუაციას.

„ იგივეს მოგიწოდებთ არა მარტო ოპოზიციურ ძალებს, არამედ ჟურნალისტებსაც, რომლებიც ჩართულნი ხართ ამ ქაოსში და რეალურად ქმნით ქვეყანაში ქაოსს, ვინც რეალურად ხართ დაინტერესებულები, რას აკეთებს მთავრობა სიტუაციიდან გამოსვლის კუთხით, შეგიძლიათ, ნებისმიერი ინფორმაცია მიიღოთ", - განაცხადა ღარიბაშვილმა.