„თავისუფალი დემოკრატები“ პარლამენტში დაგეგმილი რიგგარეშე სხდომის ჩაშლას უმრავლესობის მხრიდან უპასუხისმგებლობად აფასებენ.

როგორც „ნიუპოსტთან“ საუბარში ფრაქციის წევრმა ვიქტორ დოლიძემ განაცხადა, სხდომის ჩაშლა მათთვის მოულოდნელი არ ყოფილა.

„არც ველოდებოდით რაიმე სხვას გუშინდელი სხდომის შემდეგ, რომელიც გაიმართა იმის გასამართლებდად, რომ დღეს ეს სხდომა არ ყოფილიყო. ეს არის უპატივცემულობა პრეზიდენტის და პარლამენტის ინსტიტუტების, ასევე საკუთარი თავის მიმართ. უპატივცემულობაა, როდესაც ესეთი სავალუტო კრიზისის დროს არ ჩათვლი საჭიროდ, რომ საზოგადოებას აუხსნა რა ხდება რეალურად. რაც შეეხება უსუფაშვილის არ მოსვლას, სიმართლე გითხრათ არ ველოდი ამას. პარლამენტის თავმჯდომარე, რომელიც საპარლამენტო პროცედურებს სცემს პატივს, აუცილებლად უნდა მოსულიყო დღეს დაგეგმილ სხდომაზე. სამწუხაროდ, გადაწყვეტილება კოალიციის ფარგლებში მიიღეს და ალბათ ისიც დაეთანხმა“, - განაცხადა დოლიძემ.

პარლამენტში დაგეგმილი რიგგარეშე სხდომა, რომელიც პრეზიდენტმა მოიწვია, ქვორუმის არარსებობის გამო ჩაიშალა.

ნინო დათაშვილი