საქართველოში ამერიკის შეერთებული შტატების ელჩი რიჩარდ ნორლანდი მისი შემცვლელის პოსტზე იან კელის წარდგენას ეხმაურება.

აღნიშნულთან დაკავშირებით ელჩის განცხადება საელჩოს ვებ-გვერდზე გავრცელდა.

"პრეზიდენტმა ობამამ საქართველოში მომავალი ელჩის თანამდებობაზე კარიერის დიპლომატი იან კელი წარადგინა. მიხარია, რომ თეთრმა სახლმა წელს, ჩემ შემცვლელად, ასეთი გამოცდილი და დაფასებული კოლეგა დაასახელა. ახლა მის კანდიდატურას აშშ-ის სენატი განიხილავს და დაამტკიცებს. თბილისში მის ჩამოსვლას ზაფხულის მიწურულს, ჩემი სამწლიანი ვადის ამოწურვის შემდეგ ველოდებით. პროფესიული დიპლომატიური სამსახურის ერთ-ერთი ურთულესი ნაწილია იმ ადგილის დატოვებაზე ფიქრი, რომელიც გაიცანი და შეიყვარე, მაგრამ ეს ამ პროფესიის თვისებაა. გამგზავრებამდე დარჩენილ თვეებში ჩემთვის კვლავ პატივი იქნება, გავაკეთო ყველაფერი აშშ-საქართველოს ურთიერთობების გასაღრმავებლად, აგრეთვე დემოკრატიის, უსაფრთხოებისა და ეკონომიკური კეთილდღეობის ხელშესაწყობად ამ შესანიშნავ და უძველეს მიწაზე", - აცხადებს ნორლანდი.

შეგახსენებთ, აშშ-ის პრეზიდენტმა, ბარაკ ობამამ საქართველოში ახალი ელჩის კანდიდატურა დაასახელა.