პარლამენტში დაგეგმილი რიგგარეშე სხდომა სავარაუდოდ ისევ ჩაიშლება

პოლიტიკა - 09:08, 13 Mar, 2015

703

ქუთაისში დღეს პარლამენტის რიგგარეშე სხდომა გაიმართება. უმრავლესობის წევრები საკანონმდებლო ორგანოში მისვლას არ აპირებენ. მმართველი გუნდის განცხადებით, სხდომაზე დასწრება სავალდებულო არ არის და კანონმდებლებს ამის გამო არც სანქციები დაეკისრებათ. რეგლამენტის შესაბამისად სხდომას სპიკერი უხელმძღვანელებს.

სავარაუდოდ დაგეგმილ რიგგარეშე სესიას მხოლოდ საპარლამენტო ოპოზიცია დაესწრება, ქვორუმი სავარაუდოდ არ შეიკრიბება და სხდომა ისევ ჩაიშლება.

ქუთაისში ჩასვლას და რიგგარეშე სდომაზე დასწრებას არც ეკონომიკური გუნდის მინისტრები გეგმავენ.

ეკონომიკის მინისტრის გიორგი კვირიკაშვილის განცხადებით, პარლამენტის კომიტეტების სხდომაზე ყველა აქტუალურ საკითხზე უკვე ისაუბრეს, და აუცილებლად აღარ მიაჩნიათ ამ საკითხებზე მსჯელობა.

იგივე მოსაზრებას იზიარებს ფინანსთა მინისტრი ნოდარ ხადურიც. მისი შეფასებით, მთავრობამ უკვე გააცნო კანონმდებლებს თავისი ხედვა.

რიგგარეშე სხდომის გამართვის ინიციატივით და ხელმოწერებით პრეზიდენტს „ნაციონალურმა მოძრაობამ“ მიმართა. გიორგი მარგველაშვილს ამავე თემაზე „თავისუფალი დემოკრატებიც“ შეხვდნენ.

_{ნინო ზედგენიძე}