ერთ-ერთი მთავარი საკითხი, რომელზეც აფხაზეთის დე ფაქტო რესპუბლიკის პრეზიდენტმა, რაულ ხაჯიმბამ გალის რაიონში მოსახლეობასთან შეხვედრისას ისაუბრა, განათლების ხარისხი იყო.

მისი თქმით, მოსახლოებისთვის მშობლიურ ენაზე სწავლის უფლების აკრძალვას არ აპირებს, თუმცა მიუღებლად მიაჩნია ისეთი სახელმძღვანელოების გამოყენება, რომლებიც აფხაზეთის სახელმწიფოს არსებობას უარყოფს.

„ჩვენ პარტნიორული ურთიერთბა დავამყარეთ რუსეთთან და საქართველოსთანაც კარგი ურთიერთობის ჩამოყალიბება გვინდა, თუკი ქართული მხარე მიხვდება, რომ აფხაზეთის დამოუკიდებელი რესპუბლიკის არსებობის აღიარება, აუცილებელია" - განაცხადა ხაჯიმბამ.

თავის მხრივ, გალის რაიონის ე.წ ადმინისტრაციის ლიდერმა, თემურ ნადარაიამ განაცხადა, რომ რაიონის 20 სკოლიდან 11-ში, სწავლება საქართველოს მთავრობის მიერ შემუშავებული პროგრამით მიმდინარეობს. განსაკუთრებით, დაბალი ზონის სკოლებში. „მადლობელი ვარ იმ ადამიანების, რომლებიც არ გაიქცნენ და აფხაზეთში დარჩნენ. მაგრამ ასეთი სწავლება ამ მოქალაქეებს მძიმედ ურტყამს. საკითხავია, ის ადამიანები, რომლების აფხაზურ ენაზე ვერ წერენ და ვერ საუბრობენ, როგორ შეძლებენ სახელმწიფოში ადაპტირებას ?“ - განაცხადა ნადარაიამ. მისივე თქმით, დღეისათვის, სკოლებში უკვე დარიგდა აფხაზეთის ე.წ რესპუბლიკის პროგრამის შესაბამისად შექმნილი 4 000 სახელმძღვანელო.

ხატია ლაღიძე