დრო აღარ იცდის, საქმე ფუჭდება, მზად ვარ, ივანიშვილს და ღმერთსაც ვთხოვო გვიშველე-მეთქი

დრო აღარ იცდის, საქმე ფუჭდება, მზად ვარ, ივანიშვილს და ღმერთსაც ვთხოვო გვიშველე-მეთქი - ნიშნიანიძე

პოლიტიკა - 11:02, 12 Mar, 2015

5979

საპარლამენტო უმრავლესობის წევრის ომარ ნიშნიანიძის განცხადებით „ქართულ ოცნება“ კარგ მდგომარეობაში არ არის, მაგრამ იმის თქმა, რომ პარტია აღარ არსებობს და მოკვდა, გადაჭარბებულია. დეპუტატის თქმით, 7 მარტს გამართულ ფრაქციის სხდომაზე საუბარი იყო პარტიულ მშენებლობაზე და შეთანხმდნენ, რომ ორშაბათიდან აქტიურ მოქმედებებზე გადავლენ, ნიშნიანიძე უფრო მეტ აქტიურობას ითხოვს პარტიის აღმასრულებელი მდივნისგანაც:

„ჩვენ უფრო მეტს ვითხოვთ პარტიის აღმარულებელი მდივნისგან, კარგი ბიჭია ირაკლი კობახიძე, განათლებული, მაგრამ ეს საქმითაც უნდა დაგვანახოს, დრო აღარ იცდის. ამიტომ ვამბობთ, ორშაბათიდან აქტიურ მოქმედებაზე გადავალთ, ვინც გასაკრიტიკებელი იქნება, გავაკრიტიკებთ, ვინც რამეს დააშავებს, პირდაპირ ვამხელთ და გვარებსაც დავასახელებთ. არ მოვერიდებით არაფერს, საქმე ფუჭდება.“- აცხადებს ომარ ნიშნიანიძე.

ნიშნიანიძის თქმით, ქვეყანაში პესიმისტური განწყობის შექმნაში დამნაშავე მედიაა, რადგან ისინი ხალხს სიტუაციას გაცილებით მუქ ფერებში წარმოუდგენენ, ვიდრე რეალობაშია. ნიშნიანიძის შეფასებით, ქვეყანა ვითარდება და ამ მომენტისთვის ბიძნა ივანიშვილი პოლიტიკაში მობრუნების საჭიროება არ დგას.

„ჯერჯერობით, არაფერი ხდება ისეთი, რომ ბიძინა ივანიშვილის მობრუნება იყოს საჭირო. ამას ალალად გეუბენებით. ხან „რუსთავი 2“ -ს რომ ვუყურებ, მეც კი შემეშინდება ხოლმე და წარმოგიდგენიათ, ხალხი რა დღეში იქნება? ამ დროს მზად ვარ, მარტო ბიძინა ივანიშვილს კი არა ღმერთსაც ვთხოვო, არიქა, გვიშველე-მეთქი. არც ისეა წამხდარი საქმე, ქვეყანა ვითარდება, გარეშე ფაქტორები რომ არ ყოფილიყო, უკეთესი სიტუაცია იქნებოდა“- აცხადებს ნიშნიანიძე.