ფინანსთა სამინისტრო ადმინისტრაციული ხარჯების შემცირების თაობაზე ინფორმაციას მომავალ კვირას წარმოადგენს.

ამის შესახებ მინისტრმა ნოდარ ხადურმა მთავრობის სხდომის დაწყებამდე განაცხადა.

მისი თქმით, მანამდე ფინანსთა სამინისტრო უწყებებისგან ხარჯებთან დაკავშირებით შესაბამის ინფორმაციას ელოდება.

"უკვე ორშაბათს უნდა გვქონდეს ინფორმაცია სამინისტროების და იმ სიპების მიხედვით, რომლებიც არ არიან სამინისტროების კონტროლის ქვეშ. ამის მერე ჩვენ დავიწყებთ ამ მასალების დამუშავებას. ფინანსთა სამინისტროს გარკვეული მონახაზი უკვე აქვს, მაგრამ მაინც დაველოდებით ჩვენი კოლეგებისგან მოწოდებულ ინფორმაციას. სავარაუდოდ, მომავალი კვირის დასაწყისში ჩვენ უკვე გარკვეულ სურათს წარმოგიდგენთ", - განაცხადა ხადურმა.