ჯანდაცვის მინისტრი მიიჩნევს, რომ ქვეყანაში არსებულ ეკონომიკურ მდგომარეობაზე საზოგადოება ინფორმირებული უნდა იყოს.

ამის შესახებ დავით სერგეენკომ მთავრობის სხდომის დაწყებამდე განაცხადა.

რაც შეეხება იმას თუ რა ფორმატში მოხდება მთავრობის მიერ ეკონომიკური მდგომარეობის დასტაბილურების გეგმის წარდგენა, სერგეენკოს თქმით, ეს მისთვის რთული შესაფასებელია.

„პირველ რიგში მნიშვნელობა აქვს იმას, რომ საზოგადოება ინფორმირებული იყოს ეკონომიკური ბლოკის მიერ მიმდინარე საკითხებზე და სამოქმედო გეგმაზე, რომელიც პრაქტიკულად ჩამოყალიბებულია. რაც შეეხება იმას, თუ რა ფორმატში მოხდება ამის წარდგენა, ჩემთვის რთული შესაფასებელია. არჩეული იქნება ის გზა, რომელიც ყველაზე ეფექტური იქნება“, - განაცხადა სერგეენკომ.

დღეს პარლამენტში დარგობრივი და ეკონომიკური პოლიტიკის კომიტეტის სხდომაა ჩანიშნული, სადაც დეპუტატები ქვეყანაში არსებულ ეკონომიკურ-ფინანსურ მდგომარეობასთან დაკავშირებით დარგობრივი ბლოკის მინისტრებს და ეროვნული ბანკის პრეზიდენტს მოუსმენენ.