"არ ვაპირებ უსუფაშვილს ავყვე და იგივე ტონალობაში ვუპასუხო"

"არ ვაპირებ უსუფაშვილს ავყვე და იგივე ტონალობაში ვუპასუხო" - ნაციონალების საგანგებო განცხადება

პოლიტიკა - 18:09, 11 Mar, 2015

2178

საპარლამენტო უმცირესობის ლიდერი პრეზიდენტის მიერ რიგგარეშე საპარლამენტო სხდომის დანიშვნას და ამ თემაზე პარლამენტის თავმჯდომარის მიერ გაკეთებულ განცხადებას სპეციალური ბრიფინგით გამოეხმაურა.

დავით ბაქრაძის განცხადებით, „ნაციონალურ მოძრაობა“ ქვეყნის მთავარ პრობლემად სწორედ გაძვირებულ ცხოვრებას და ეკონომიკურ პრობლემებს თვლის და თავს ვალდებულად მიიჩნევს ამ თემაზე ყველა შესაძლო ადგილზე, მათ შორის პარლამენტის რიგგარეშე სხდომაზეც ისაუბროს.

დავით ბაქრაძემ ბრიფინგზე წარმოადგინა დოკუმენტი, რომელშიც მისი თქმით განხილული იყო კრიზისიდან გამოსვლის ნაბიჯები. ბაქრაძის განცხადებით, მიუხედავად იმისა, რომ დოკუმენტის წარდგენა ბიუროსთვის დეკემბრის თვეში მოხდა, პროცედურული საკითხების მომიზეზების გამო ამ დოკუმენტის განხილვა ჯერ კიდევ არ მომხდარა.

ბაქრაძის განცხადებით, შექმნილი ეკონომიკური მდგომარეობის გამო რიგგარეშე სხდომის და ამ სხდომაზე მთავრობის წევრების დასწრების აუცილებლობის შესახებ საუბარი იყო პრეზიდენტის, პარლამენტის თავმჯდომარის და პრემიერისთვის გაგზავნილ წერილებშიც.

„როდესაც პრემიერ-მინისტრს უგზავნი წერილს, ეუბნები, რომ რიგგარეშე სხდომაზე განიხილავ ლარის სტაბილიზაციის საკითხს და თხოვ რომ მთავრობამ მონაწილეობა მიიღოს სხდომაში, მე არ ვიცი მეტი გასაგებად ქართულ ენაზე, როგორ უნდა ჩამოვაყალიბოთ ჩვენი მოთხოვნა, რაც შეეხება დეტალებს და დეტალების მომიზეზებას, ვინ გამოვა, რამდენი წუთი ილაპარაკებს და როგორ, ეს ბიუროს განსასაზღვრია“ - განაცხადა ბაქრაძემ.

ბაქრაძის თქმით ოპოზიციაზე საუბრისას უსუფაშვილმა მიუღებელი ტონალობა აირჩია, როდესაც განაცხადა, რომ ოპოზიცია არის უსაქმური და უპასუხისმგებლო.

„მე ნამდვილად არ ვაპირებ აყოლას და იგივე ტონალობაში პასუხს, თუმცა ძალიან ბევრი შემეძლო მესაუბრა ხელისუფლების უსაქმურობაზე და უპასუხისმგებლობაზე.“- აღნიშნა ბაქრაძემ.

ბაქრაძის განცხადებით ოპოზიცია მზადაა მშვიდ და კონსტრუქციულ ვითარებაში მოისმინოს კრიზისიდან გამოსვლის ხელისუფლების გეგმა და წარუდგინოს საკუთარი გეგმა.

_{ნინო ზედგენიძე}