მთავრობა რეგიონის განვითარებისთვის ახალ გეგმას ამზადებს. ამის შესახებ ადგილობრივი ხელისუფლების ხელმძღვანელებთან შეხვედრისას პრემიერ-მინისტრმა განაცხადა.

ღარიბაშვილის თქმით, მთავრობის ეკონომიკურმა გუნდმა უკვე შეისწავლა რეგიონში არსებული ეკონომიური ვითარება და იქ არსებული პოტენციალი.

ირაკლი ღარიბაშვილის განმარტებით, გამოვლინდა რამდენიმე პრიორიტეტული მიმართულება, რა მიმართულებითაც მთავრობა კონკრეტულ ღონისძიებებს განახორციელებს.

„ხდება ადგილობრივი და ცენტრალური ხელისუფლების, ადგილობრივი ბიზნესის და ინვესტორების მობილიზება, რათა მათ შევთავაზოთ ახალი პროექტების დაწყება ჩვენი მაქსიმალური ხელშეწყობით. ინიციატივა გულისხმობს მეწარმეთა მაქსიმალურ ხელშეწყობას, რეგიონებში სახელმწიფო საკუთრებაში არსებული ქონების პრივატიზებას და სხვა ღონისძიებებს. აქ თქვენი ჩართულობა ძალიან მნიშვნელოვანია. ეს გახდება კიდევ უფრო მეტი ახალი საწარმოს შექმნის და მეტი ადამიანის დასაქმების საფუძველი“, - განაცხადა პრემიერმა და განმარტა, რომ რეგიონებში გასვლებს ეკონომიკურ გუნდთან ერთად მომავალი კვირიდან აპირებს.