რიგგარეშე სხდომისთვის საკითხი ისეა ფორმულირებული, რომ მას პარლამენტი ვერ განიხილავს- უსუფაშვილი

პოლიტიკა - 15:59, 11 Mar, 2015

998

პარლამენტის თავმჯდომარის დავით უსუფაშვილის განცხადებით, რიგგარეშე სხდომაზე განსახილველი საკითხი არასწორად არის ფორმულირებული. უსუფაშვილის შეფასებით ეს კიდევ ერთი ნიშანია იმისა, რომ რიგგარეშე სხდომის მოწვევა, მხოლოდ საგანგაშო რეჟიმის და ხმაურის შესაქმნელად მოხდა.

"პარლამენტის 42-მა წევრმა "ნაციონალური მოძრაობიდან" პრეზიდენტს მიმართა, რომ მოეწვია რიგგარეშე სხდომა, სადაც "განხილულ იქნება საკითხი, რომელიც შეეხება ქვეყანაში არსებული მძიმე ეკონომიკური კრიზისიდან გამოსვლის მექანიზმებს და საშუალებებს, სამომავლოდ ქვეყნის ეკონომიკური განვითარებისთვის აუცილებელი გზების მოძიებას და ქვეყნის ეროვნული ვალუტის, ლარის კურსის სტაბილურობისკენ მიმართულ ღონისძიებებს". რიგგარეშე სხდომა არაფრით განსხვავდება ჩვეულებრივი სხდომისგან, გარდა იმისა, რომ რიგგარეშე სხდომას აქვს ფიქსირებული დღის წესრიგი. ფიქსირებულ დღის წესრიგში უნდა იყოს შეტანილი საკითხი, რომლის განხილვა შესაძლებელია. მე მეკითხებიან პარლამენტის წევრები, რა უნდა განვიხილოთ, კანონპროექტი? კანონპროექტი არ არის ინიცირებული. დადგენილების პროექტი? დადგენილების პროექტი არ არის ინიცირებული, არ არის შემოსული პარლამენტში. პარლამენტში შემოსულია საკითხი. საკითხების განხილვას აქვს თავისი რეჟიმი. პოლიტიკური დებატები ჩავატაროთ? პოლიტიკური დებატები არ არის მოთხოვნილი დღის წესრიგში. მთავრობის ანგარიში მოვისმინოთ? ესეც გათვალისწინებულია რეგლამენტში, მაგრამ დღის წესრიგში უნდა იყოს შეტანილი შესაბამისი მოთხოვნა. საკითხი ისეა ფორმულირებული, რომ მას ვერ განიხილავს პარლამენტი ვერანაირ რეჟიმში რასაც კი იცნობს ჩვენი მოქმედი რეგლამენტი", - არნიშნა პარლამენტის სპიკერმა.

უსუფაშვილის განცხადებით პრეზიდენტი შეეცადა უფრო დაეკონკრეტებინა და გაეკეთილშობილებინა "ნაციონალური მოძრაობის" მიერ ინიცირებული საკითხი და განსახილველად მხოლოდ ლარის კურსის სტაბილიზაციისკენ მიმართული ღონისძიებები წარმოადგინა. თუმცა უსუფაშვილის თქმით სამსჯელო თემაა ისიც, აქვს თუ არა პრეზიდენტს ამ ცვლილებების განხორციელების უფლება:

"აქვს თუ არა პრეზიდენტს უფლება შეიტანოს თუ არა ცვლილება მოთხოვნილ დღის წესრიგში, ეს ცალკე სამსჯელო თემაა. ამ შემთხვევაშიც, ყველა პრობლემა რჩება უცვლელი. ლარის კურსის სტაბილიზაციისკენ მიმართული ღონისძიებები რა რეჟიმში განვიხილოთ, როგორ რეჟიმში განვიხილოთ, ეს არის სრულიად უცნობი. რასთან გვაქვს საქმე? ჩვენი ოპონენტების არაკომპეტენტურობაზე? "ნაციონალურ მოძრაობას" შეიძლება ბევრი რამე დაწამო, მაგრამ ის რომ საპარლამენტო მუშაობის წესები და პრაქტიკა არ იციან, არა. ამოცანაა მხოლოდ ხმაური. მხოლოდ საგანგაშო რეჟიმის შექმნა. სხვა შემთხვევაში, მათ ძალიან კარგად იციან, როგორ ხდება რიგგარეშე სხდომის მოწვევა. ეს იცის პრეზიდენტმაც. როდესაც მოთხოვნილია რიგგარეშე სხდომა, მითითებულია კონკრეტული მუხლები, კანონები, რომელი მოსმენით განიხილება და ა.შ "- განაცხადა პარლამენტის თავმჯდომარემ.