საგარეო საქმეთა მინისტრის მოადგილე დავით ჯალაღანია ამბობს, რომ ჩეხეთის პარლამენტის ასოცირების ხელშეკრულების რატიფიციკაციის გადადებასთან „ენერგო პროს“ შემთხვევას კავშირი არ აქვს.

ამის შესახებ ჯალაღანიამ ჟურნალისტებთან საუბრისას განაცხადა.

მისი თქმით, ამ ეტაპზე საქათველოს შესაბამისი სტრუქტურები კომპანიასთან დიალოგის რეჟიმში არიან.

რაც შეეხება რატიფიკაციის პროცესს, ჯალაღანიას განმარტებით, ჩეხეთის პარლამენტში ხვალ იმართება სხდომა, სადაც სავარაუდოდ, ასოცირების შეთანხმების რატიფიცირების საკითხი დადგება.

„ვიცი, რომ კომპანიასა და საქართველოს შესაბამის სტრუქტურებს შორის დიალოგი მიმდინარეობს, ძირითადად საკითხები, რაც კითხვებს აჩენს გადაწყვეტის ფაზაშია. მინდა დავიჯერო, რომ ეს კონკრეტული შემთხვევა ჩეხეთის პარლამენტის მიერ რატიფიცირებაზე ზეგავლენას არ მოახდენს", - განაცხადა ჯალაღანიამ.

„რუსთავი 2“-მა გაავრცელა ინფორმაცია, რომ ჩეხეთის პარლამენტმა საქართველოს ევროკავშირთან ასოცირების ხელშეკრულების რატიფიცირება გადადო. ამის მიზეზი კი კომპანია "ენერგო-პროს" დავაა საქართველოს სახელმწიფოსთან.

ნინი კაციტაძე