საგარეო უწყების განმარტება საქართველო-ბრაზიალიას შორის უვიზო მიმოსვლის ამოქმედებაზე

პოლიტიკა - 13:04, 11 Mar, 2015

1383

საგარეო საქმეთა სამინისტრო ბრაზილიასთან უვიზო მიმოსვლის ამოქმედებაზე განმარტებას აკეთებს. უწყების ცნობით, გავრცელებული ინფორმაცია, რომ ორ ქვეყანას შორის უვიზო მიმოსვლის შესახებ შეთანხმება 2011 წელს შევიდა ძალაში, არასწორია.
"საგარეო საქმეთა სამინისტროში, საქართველოს მხრიდან ხელი მოეწერება საქართველოსა და ბრაზილიას შორის უვიზო მიმოსვლის შესახებ შეთანხმებას.
ამასთან დაკავშირებით, სამწუხაროდ საზოგადოების დეზინფორმაციაში შეყვანის მიზნით, ვრცელდება ინფორმაცია, რომ თითქოს ეს შეთანხმება 2011 წელს შევიდა ძალაში, რაც არასწორია. ამასთან დაკავშირებით საჭიროდ ჩავთვალეთ განვმარტოთ, რომ 2011 წელს გაფორმდა შეთანხმება, რომლის თანახმადაც უნდა ამოქმედებულიყო უვიზო მიმოსვლის რეჟიმი, მაგრამ ის არ ამოქმედებულა, ვინაიდან ბრაზილიის მხარეს შიდასახელმწიფოებრივი პროცედურები არ დაუსრულებია.
მას შემდეგ მიმდინარეობდა აქტიური, კოორდინირებული მუშაობა ბრაზილიის მხარესთან შეთანხმების ძალაში შესვლის უზრუნველყოფისათვის.საბოლოოდ ბრაზილიის კანონმდებლობაში შესული ცვლილებების შემდეგ გადაწყდა შეთანხმების დადება ნოტების გაცვლის გზით. ბრაზილიის მხარემ შესაბამისი პროცედურები და შეთანხმების ხელმოწერა რამდენიმე კვირის წინ განახორციელა. აღნიშნული პროცედურა კი საბოლოოდ დღეს დასრულდება ქართული მხარის მიერ შეთანხმებაზე ხელმოწერით. შეთანხმება ძალაში შევა 30 დღეში", - ნათქვამია სამინისტროს მიერ გავრცელებულ განცხადებაში,
ნინი კაციტაძე