ენერგეტიკის მინისტრის კახი კალაძის მტკიცებით, ჩეხეთის პარლამენტის მიერ საქართველოს ევროკავშირთან ასოცირების ხელშეკრულების რატიფიციკაციის გადადებას „ენერგო პროსთან“ კავშირი არ აქვს.

მისი თქმით, კომპანიის მიმართ ფინანსთა სამინისტროს კითხვები ნორმალურია და ამაში განსაკუთრებული არაფერია.

„ის, რომ ფინანსთა სამინისტროს „ენერგო პროსთან“ კითხვები აქვს, ეს ნორმალურია. ისინი კონკრეტული კომპანიების შესწავლას ახორციელებენ. ეს არის მათი მოვალეობა და თუ რაიმე კანონდარღვევა აღმოაჩინეს, შეუძლიათ ითანამშრომლონ და თანამშრომლობენ კიდეც კომპანიასთან. თუ „ენერგო პროს“ მიაჩნია, რომ რაღაც დარიცხვა არასწორი იყო, ეს ჩვეულებრივი დავის საგანი იქნება და რაღაც შეთანხმება იქნება მიღწეული. ამ დავას ჩეხეთის პარლამენტის მიერ ევროკავშირი-საქართველოს ასოცირების შეთანხმების რატიფიცირების გადადებასთან კავშირი არ აქვს“, - განაცხადა კალაძემ.

„რუსთავი 2“-მა გაავრცელა ინფორმაცია, რომ ჩეხეთის პარლამენტმა საქართველოს ევროკავშირთან ასოცირების ხელშეკრულების რატიფიცირება გადადო. ამის მიზეზი კი კომპანია "ენერგო-პროს" დავაა საქართველოს სახელმწიფოსთან.

ნინი კაციტაძე