მთავრობა თავხედურად იქცევა, აკეთებს იმას, რაც ივანიშვილს უნდა და არა ხალხს

მთავრობა თავხედურად იქცევა, აკეთებს იმას, რაც ივანიშვილს უნდა და არა ხალხს - ჭიაბერაშვილი

პოლიტიკა - 19:36, 10 Mar, 2015

2755

ბიძინა ივანიშვილის მთავრობამ და მისმა საპარლამენტო უმრავლესობამ მოქმედების ასეთი წესია აირჩია, რომ ისინი გაურბიან იმ პრობლემებზე საუბარს, რომელიც მათ მიერ არის შექმნილი - ასე აფასებს ,,ნიუპოსტთან“ კომენტარში ,,ნაციონალური მოძრაობის“ ერთ-ერთი ლიდერი ზურაბ ჭიაბერაშვილი მმართველი გუნდის დღევანდელ გადაწყვეტილბას, რომლის მიხედვითაც მათ უარი განაცხადეს მისულიყვნენ პრეზიდენტთან დაგეგმილ შეხვედრაზე, სადაც საუბარი შეეხებოდა ოკუპირებულ ტერიტორიებზე შექმნილ ვითარებას. მმართველი გუნდი არც რიგგარეშე სხდომაზე დასწრებას აპირებს, სადაც საპარლამენტო უმცირესობის ინიციატივით ქვეყანაში მიმდინარე ეკონომიკური საკითხები უნდა განხილულიყო.

,,პირველ რიგში გავიხსენებ მათ არმისვლას პარლამენტში საგანგებო სხდომაზე, როდესაც საქმე ეხებოდა ეკონომიკაში შექმნილ კატასროფულ მდგომარეობას. იმის გამო, რომ ბიძინა ივანიშვილს არ მოსწონს პრეზიდენტი მარგველაშვილი, ხდება ის რომ საპარლამენტო უმრავლესობა ასევე იგნორირებას უკეთებს საპრეზიდენტო ინსტიტუტს და არ მონაწილეობს ქვეყნისთვის ისეთ მნიშვნელოვან საკითხში, როგორიც არის ოკუპირებული ტერიტორიები .

ხელისუფლება ყველაფერზე ამბობს, რომ თითოს მიმდინარეობს სამუშაო პროცესი და არ უნდათ პოლიტიკურ შოუებში მონაწილოეობის მიღება, ამ დროს მათ ყველაფერი პოლიტიკურ შოუდ აქციეს, მათი საქმიანობა ემსგავსება შოუს, დაკავებულები არიან იმით, რომ ებრძოლონ ინსტიტუციებს, მოხდეს პარლამენტის და პრეზიდენტის ინსტიტუციების დამცირება და აკეთონ მხოლოდ ის, რაც უნდა ივანიშვილს. ეს პირდაპირ მიუთითებს იმაზე, რომ ისინი არ არიან ანგარიშვალდებული ხალხის წინაშე“ - აცხადებს ჭიაბერაშვილი.

მისი თქმით, მთავრობა იქცევა თავხედურად. ,,უმრავლესობა არ მიდის პრეზიდენტთან, მთავრობა არ მიდის პარლამენტში, ქალაქის მერი არ მიდის საკრებულოში, ამიტომ მათი ეს მიდგომა ჩანს თითოეულ ნაბიჯზე“ - აცხადებს ჭიაბერაშვილი.

ჭიაბერაშვილი ამბობს, რომ ოპოზიცია შეეცადა, ყველაფერი საპარლამენო ცხოვრების წესში მოექცია, რაზეც მათ მთავრობისგან უარი მიიღეს. მისი თქმით, მთავრობამ შექნა პრობლემები, რომელთა გამოსწორება არ შეუძლიათ, რის გამოც, ,,ნაციონალური მოძრაობის“ ერთ-ერთი ლიდერის განცხადებით, მთავრობა უნდა გადაგდეს.

,,ჩვენ, როგორც პოლიტიკური გუნდი მოვითხოვთ მთავრობის გადადგომას, ეს იქნება ჩვენი 21 მარტის დემონსტრაციის ლოზუნგი, რომ მთვარობა უნდა გადადგეს, რადგან ეს მთავრობა არა მხოლოდ არაკომპეტენტური და უუნაროა“ - აცხადებს ჭიაბერაშვილი.