ქსენოფობიის გაღვივება და დარტყმა ეკონომიკაზე - ბოკერია წულუკიანის პასუხისმგებლობაზე საუბრობს

პოლიტიკა - 18:07, 10 Mar, 2015

833

„ნაციონალური მოძრაობის“ საგარეო ურთიერთობათა მდივანი გიგა ბოკერია საქართველოს იუსტიციის მინისტრის თეა წულუკიანის მიერ სავიზო რეგულაციებთან დაკავშირებით გაკეთებულ განცხადებას ეხმაურება. ბოკერიას აზრით, წულუკიანი პასუხისმგებელია, როგორც ქსენოფობიური განწყობების გაღვივებაზე, ასევე სავიზო პოლიტიკის შედეგად საქართველოს ეკონომიკისთვის მიყენებულ ზარალზეც:

“მე ვერ გავაკეთებ კომენტარს რომელიმე ქვეყნის საელჩოს განცხადებაზე, მაგრამ საქართველოს იუსტიციის მინისტრი ქალბატონი თეა წულუკიანი არის ერთი მხრივ პასუხისმგებელი ქსენოფობიური განწყობების გაღვივებაზე და მეორე მხრივ, პასუხისმგებელია იმ უმძიმეს დარტყმაზე, რომელიც მიიღო საქართველოს ეკონომიკამ, ტურიზმმა, ლარმა ამ სავიზო პოლიტიკის შედეგად და ეს აისახა თითოეული ჩვენი მოქალაქის შემოსავალზე და უმძიმეს კრიზისში ჩააგდო ქვეყანა. ეს კრიზისი კიდევ უფრო ღრმავდება და დღეს, როცა ყველასთვის ნათელია, როგორი ბრიყვული და არაკომპეტენტური იყო ეს პოლიტიკა, ამ პოლიტიკის შეცვლის ნაცვლად, ისინი აგრძელებენ ამ აბსოლუტურად უპასუხისმგებლო ქსენოფობიურ განცხადებებს და კიდევ უფრო აღრმავებენ იმ პრობლემას, რომლის წინაშეც ჩვენი საზოგადოება დგას. ”- განაცხადა გიგა ბოკერიამ.