ირაკლი ღარიბაშვილი ეუთო-ს გენერალურ მდივანს შეხვდა

პოლიტიკა - 17:31, 10 Mar, 2015

1181

საქართველოში ეუთო-ს მისიის აღდგენის მნიშვნელობა, საოკუპაციო ზოლთან მდებარე სოფლებში არსებული მდგომარეობა და რუსეთის მიერ აფხაზეთისა და ცხინვალის დე-ფაქტო რეჟიმებთან ე.წ შეთანხმებების გაფორმება იყო პრემიერ-მინისტრ ირაკლი ღარიბაშვილისა და ეუთო-ს გენერალური მდივნის ლამბერტო ზანიერის შეხვედრის მთავარი თემები.

მხარეებმა დეტალურად განიხილეს კონფლიქტისპირა სოფლებში არსებული ჰუმანიტარული ვითარება და იმ პროგრამებზე ისაუბრეს, რომელსაც საქართველოს მთავრობა მოსახლეობის დახმარების მიზნით ახორციელებს.

შეხვედრაზე კიდევ ერთხელ გამოითქვა შეშფოთება რუსეთის მიერ აფხაზეთისა და ცხინვალის საოკუპაციო რეჟიმებთან ე.წ მოკავშირეობის შეთანხმებების გაფორმებასთან დაკავშირებით, რასაც საქართველოს ხელისუფლება რეგიონების ანექსიისკენ გადადგმულ ნაბიჯად აფასებს.

საუბრის ერთ-ერთი თემა იყო რუსეთ-საქართველოს ურთიერთობები. პრემიერ-მინისტრმა აღნიშნა, რომ პოზიტიური დინამიკა ჰუმანიტარულ-ეკონომიკურ ურთიერთობებში პოლიტიკურ ვითარებას არ ცვლის, რადგან საქართველოს მთავრობის კონსტრუქციულ მიდგომას რუსეთი ადეკატურად არ პასუხობს.

მხარეებმა ასევე იმსჯელეს ჟენევის საერთაშორისო დისკუსიების მნიშვნელობაზე, რომლის მორიგი, 31-ე რაუნდი შვეიცარიაში 17-18 მარტს გაიმართება.