ფინანსთა მინისტრი ნოდარ ხადური უარყოფს ინფორმაციას, რომ ჩეხეთის პარლამენტმა საქართველოს ევროკავშირთან ასოცირების ხელშეკრულების რატიფიციკაცია "ენერგო პრო–ჯორჯიასა" და საქართველოს სახელმწიფოს ფინანსური დავის გამო გადადო.

ნოდარ ხადური განმარტავს, რომ კომპანიისთვის თანხის გადახდის დაკისრება ჩვეულებრივი საგადასახადო ქეისია და არასწორია საუბარი იმაზე, რომ საქართველოს მთავრობა ვინმეს რამეს სთხოვდა.

„ეს არის ჩვეულებრივი საგადასახადო დავა. შემოსვლების სამსახურის აუდიტორებმა შეამოწმეს აღნიშნული კომპანია და მას დაერიცხა გარკვეული თანხა. კომპანია ნაწილს დაეთანხმა, ხოლო ნაწილზე კი დავა დაიწყო. დავის პროცესი მიმდინარეობს. ერთ-ერთი დავა, რომელსაც მეც ვესწრებოდი გაშული კვირის ხუთშაბათს იყო. ვთხოვეთ დამატებითი ინფორმაციის წარმოდგენა, რაღაც ნაწილში დავაკმაყოფილეთ კომპანიის მოთხვნები, რადგან ჩავთვალეთ, რომ სამართლიანი იყო. რაღაც ნაწილში კი არ დავეთანხმეთ. თუმცა არის მესამე ნაწილი, რომელზეც ვთხოვეთ კომპანიას, დამატებითი მტკიცებულებები წარმოადგინოს, რომ ეს თანხები მის საქმიანობას მოხმარდა. რაც შეეხება კომპანიის საქმიანობას მას მუშაობა არც ერთი წუთით არ შეუფერხებია“, - განაცხადა ხადურმა.

„რუსთავი 2“-მა გუშინ გაავრცელა ინფორმაცია, რომ ჩეხეთის პარლამენტმა საქართველოს ევროკავშირთან ასოცირების ხელშეკრულების რატიფიცირება გადადო. ამის მიზეზი კი კომპანია "ენერგო-პროს" დავაა საქართველოს სახელმწიფოსთან.

ნინი კაციტაძე