არასაპარლამენტო ოპოზიციური პარტიების ერთობლივი განცხადება

პოლიტიკა - 10:17, 10 Mar, 2015

1704

არასაპარლამენტო ოპოზიციური პარტიები საპროტესტო აქციების გამართვაზე მორატორიუმს აცხადებენ და ხელისუფლებას კონსტრუქციული დიალოგის გამართვისკენ მოუწოდებენ. ამასთან დაკავშირებით კუკავა-ჯოჯუა-ღლონტის პარტიებმა ერთობლივი განცხადებას გაავრცელეს :

"მას შემდეგ რაც რეალურმა ოპოზიციურმა ძალებმა დავიწყეთ საპროტესტო აქციები, ხელისუფლებამ და მისმა სატელიტებმა დაიწყო სხვადასხვა ტიპის პროვოკაციების დაგეგმვა ჩვენს წინააღმდეგ. პარალელურად, 21 მარტს დაინიშნა ფსევდო-ოპოზიციის მიტინგი რუსთაველის გამზირზე. „ოცნება“ და „ნაციონალები“ ისევ ცდილობენ ქვეყანას თავზე მოახვიონ თავიანთი პოლიტიკური დაპირისპირება, როგორც ერთადერთი საკითხი ქვეყნის პოლიტიკურ დღის წესრიგში, ხოლო მთელ დანარჩენ საზოგადოებას და მის მოთხოვნებს იგნორირება გაუკეთონ.

შექმნილ ვითრებაში 21 მარტამდე ვაცხადებთ მორატორიუმს საპროტესტო აქციების გამართვაზე და ხელისუფლებას ვთავაზობთ გამართოს კონსტრუქციული დიალოგი რეალურ ოპოზიციასთან შემდეგ საკითხებზე:

პარლამენტის თავმჯდომარემ:

1. „ნაციონალური მოძრაობის“ დანაშაულებრივი რეჟიმის შეფასება, კანონი ლუსტრაციის შესახებ;

2. სასოფლო მიწების პრივატიზების შესახებ კანონპროექტი;

იუსტიციის მინისტრმა და მთავარმა პროკურორმა:

3. 7 ნოემბრის და 26 მაისის დარბევების გამოძიება, აგრეთვე ადამიანების ლიკვიდაციის, წამების, 2008 წლის 5 იანვრის საპრეზიდენტო არჩევნების გაყალბების გამოძიება;

4. ყოფილი უკანონო პატიმრების სისხლის სამართლის საქმეების გადახედვა;

ეკონომიკის და ფინანსთა მინისტრებმა:

5. ეკონომიკური კრიზისის დაძლევის პროგრამა;

ჯანდაცვის და ენერგეტიკის მინისტრებმა:

6. საწვავზე და მედიკამენტებზე მონოპოლიური ტარიფები (კარტელური გარიგებების შეზღუდვა);"

ქვეყნის რეალურმა მმართველმა - ბიძინა ივანიშვილმა:

1. „ოცნების“ საარჩევნო დაპირებების შესრულება: სოფლის მეურნეობაში და გადამამუშავებელ წარმოებაში ინვესტიცია (1.000.000.000 აშშ დოლარი);

2. იპოთეკით დაზარალებულებისა და ე.წ. ბინათმოსარგებლეების გამოსახლებაზე მორატორიუმის დაწესება, რესტრუქტურიზაციის დაბალპროცენტიანი და გრძელვადიანი სესხები;

თუ ხელისუფლება უარს იტყვის რეალურ ოპოზიციასთან დიალოგზე, 22 მარტიდან ჩვენ განვაახლებთ მწვავე საპროტესტო აქციებს.

კუკავა კახა

ღლონტი ირაკლი

ჯოჯუა გოჩა