წულუკიანის განცხადება გაუაზრებელი და არაკვალიფიციური იყო

წულუკიანის განცხადება გაუაზრებელი და არაკვალიფიციური იყო - ირანის საელჩო

პოლიტიკა - 19:12, 09 Mar, 2015

3894

საქართველოში ირანის ისლამისტური რესპუბლიკის საელჩო ისუტიციის მინისტრის თეა წულუკიანის განცხადებას გამოეხმაურა და მას „არაეგობრული“ უწოდა.

საელჩოს პრესსამსახურის მიერ გავრცელებულ განცხადებაში ნათქვამია, რომ ირანის რესპუბლიკა იყო ერთერთი პირველი, რომელმაც საქართველოს დამოუკიდებლობა აღიარა და ყოველთვის საქართველოს უჭერდა მხარს.

"ორიოდე გონივრული სიტყვა საქართველოს იუსტიციის მინისტრის, ქალბატონ თეა წულუკიანის არაკვალიფიციურ და გაუაზრებელ განცხადებასთან დაკავშირებით ირანელებისა და ირანის მოქალაქეების შესახებ: 1992 წელს საქართველოს დამოუკიდებლობის აღდგენიდან დღემდე, ირანი, რომელსაც სამიათასწლიანი ბრწყინვალე ცივილიზაციის ისტორია აქვს და გამორჩეული ადგილი ეკავა და უკავია მსოფლიოში, ყოველთვის საქართველოს გვერდით იყო. ირანი იყო ერთ–ერთო პირველი, რომელმაც საქართველოს დამოუკიდებლობა აღიარა, მეგობრული ურთიერთობა დაამყარა, და ბოლო 33 წლის განმავლობაში ყოველგვარი სირთულეებისა და გამოწვევების დროს საქართველოს უჭერდა მხარს. 2 – ისტორიის მანძილზე, ირანელებს, რომლებიც გონიერი და მაღალი კულტურის ხალხია, სხვადასხვა ქვეყანაში, სადაც კი უწევდათ ცხოვრება, ემსახურებოდნენ იმ ქვეყნის აღმშენებლობას, წარმატებებსა და კეთილდღეობას. ამრიგად, ირანელი ინვესტორებისა და ტურისტებისათვის დაწესებული შეზღუდვები შეიძლება მივიჩნიოთ საქართველოს მიერ ირანელი მეგობრების ცოდნის, კაპიტალისა და ღირებული სამსახურის დაკარგვად; ამასთან ეს გავლენას ვერ მოახდენს მსოფლიოს ხალხთა შორის არსებულ ურთიერთობებზე, მიუხედავად ზოგიერთების რასისტული და ქსენოფობიური მოსაზრებებისა", - ნათქვამია ირანის ისლამური რესპუბლიკის საელჩოს პრესის სამსახურის განცხადებაში.

შეგახსენებთ, რომ საქართველოს იუსტიციის მინისტრმა სავიზო პოლიტიკის გამკაცრებასთან დაკავშირებით ისაუბრა და განაცხადა, რომ ეს პოლიტიკა ჩინელი, ერაყელი, ირანელი და ეგვიპტელი ტურისტების ნაკადს შეეხო.