თბილისის მერია ველოსიპედის ძეგლის შესახებ გავრცელებულ ინფორმაციას არ ადასტურებს

პოლიტიკა - 18:24, 09 Mar, 2015

1477

თბილისის მერია არ ადასტურებს ვარდების მოედნიდან ველოსიპედის ძეგლის სხვა ტერიტორიაზე გადატანის შესახებ მედიაში გავრცელებულ ინფორმაციას და აღნიშნულთან დაკავშირებით განცხადებას ავრცელებს:

„დღეს მედიასაშუალებებით გავრცელდა ინფორმაცია, თითქოსდა თბილისის მერთან მრჩეველთა საბჭო შეიქმნა. ასევე, გამოქვეყნდა ინტერვიუ აღნიშნული საბჭოს თავმჯდომარესთან, რომელიც ინტერვიუში გარკვეული პროექტებისა და ინიციატივების შესახებ საუბრობს. მათ შორის, საუბარია იმაზეც, რომ მერია უახლოეს დღეებში ვარდების მოედნიდან ველოსიპედის ძეგლის სხვა ტერიტორიაზე გადატანას გეგმავს.

გვინდა განვაცხადოთ, რომ თბილისის მერიაში მერთან არსებული მრჩეველთა საბჭო არ შექმნილა. წინადადება ამგვარი საბჭოს ჩამოყალიბების შესახებ საინიციატივო ჯგუფისგან მოდიოდა, თუმცა, დედაქალაქის მერს მისი შექმნის შესახებ გადაწყვეტილება არ მიუღია. შესაბამისად, არც იმ ინიციატივებზეა გადაწყვეტილება მიღებული, რომელიც აღნიშნულმა ჯგუფმა მერთან შეხვედრისას დააყენა, მათ შორის, არც ველოსიპედის გადატანის იდეის შესახებ.“- აღნიშნულია განცხადებაში.

შეგახსენებთ , აღნიშნულ თემასთან დაკავშირებით დღეს ინფორმაცია გაზეთმა " რეზონანსმა" გავრცელა,

მერიის მრჩეველთა საბჭოს თავმჯდომარის, მწერალ რევაზ მიშველაძის განცხადებით, უახლოეს დღეებში დედაქალაქის მერიაში სხდომა გაიმართება, სადაც საბჭოს წევრები მერის წინაშე ყველა იმ პრობლემურ საკითხს დააყენებენ, რომლის გადაწყვეტაც უახლოესი მომავლის საქმეა.
„დღე-დღეზე ველოდები მრჩეველთა საბჭოს სხდომაზე მიღებული ორი საშური გადაწყვეტილების შესრულებას . პირველი ეს გახლავთ „ვარდების მოედნიდან“ ყბადაღებული ველოსიპედის ძეგლის აღებას და მწერალთა კავშირისთვის „მწერალთა სასახლეში“ ორი ოთახის გამოყოფას, რასაც მხარს უჭერს საქართველოს მთავრობა, კულტურის სამინისტრო. როგორც ჩანს , საბოლოოდ მაინც ამ საქმეს თბილისის მერმა უნდა შეაბას ეჟვანი.“- აცხადებს რევაზ მიშველაძე.

_{ნინო ზედგენიძე}