საქართველოს ევროპის და ევროატლანტიკური სტრუქტურებში გაწევრიანების შანსები პოლიტოლოგმა სოსო ცინცაძემ გაზეთ „კვირის ქრონიკასთან“ შეაფასა. პოლიტოლოგის აზრით საქართველოს საგარეო პოლიტიკური კურსის შესწავლა და კორექტირება უნდა მოხდეს, იმის გათვალისწინებით რომ უახლოეს მომავალში NATO ახალი წევრების მიღებას არ აპირებს.

სოსო ცინცაძის განცხადებით რუსეთთან ურთიერთობის დარეგულირება უფრო აქტიურად უნდა დაიწყოს, ექსპერტს ამის წარმატებულ მაგალითად სომხეთი მოჰყავს:

„ერევანი რუსეთისკენ კი არის მაგრამ არც ევროპისკენ მიმავალი ხიდი უნდა დაიწვას. ასე უნდა მოვიქცეთ ჩვენც, ბოლოს ყოველთვის მოგებული რჩება ის ხბო, რომელიც ორ ძუძუს წოვს. ჩვენ ბოლო 10- წლიანი დიპლომატიით იმდენი შევძელით, რომ ერთი მიმართულების გარდა, არაფერი არ დავიტოვეთ, ყველა კვერცხი ერთ კალათში ჩავდეთ და ასე მოვედით დღემდე. რასაკვირველია, მეც ევროპის მომხრე ვარ, მაგრამ თუ არც ერთში მიღებენ და არც მეორეში, თან ვიცი, რომ მინიმუმ, 30 წელი არ მიმიღებენ, მაშინ რა ვქნა, ისლამისტი ფანატიკოსი ხომ არ ვარ, გამოვაცხადო, ან ალაჰი, ან სიკვდილი- მეთქი? ჩვენთან ამის გამო თაობები უნდა გაწყდნენ შიმშილით და ომით? იყოს და აკაკუნოს უსუფაშვილმა კოდალასავით, აკაკუნონ „ნაციონალებმაც“. კოდალას მეტი საქმე არ აქვს, უნდა აკაკუნოს, ამ კაკუნში ვიღაცა თავში ჩაგიბრახუნებს, ეს იქნება რუსეთი.“- განაცხადა სოსო ცინცაძემ.

წყარო“ კვირის ქრონიკა“