ინფრასტრუქტურის მინისტრის მოადგილე ნოდარ ჯავახიშვილის ინფორმაციით, ხშირ შემთხვევაში რეგიონებში ტენდერებში ერთი და იგივე კომპანია მონაწილეობს და გამარჯვებულად ცხადდება.

მინისტრის მოადგილე პირობას დებს, რომ თუ ვინმე ტენდერებში იჩაგრება ამ საკითხს საფუძვლიანად შეისწავლის.

„გიდასტურებთ, რომ ხშირ შემთხვევაში­ ტენდერებში ერთი და იგივე კომპანია მონაწილეობს და გამარჯვებულად ცხადდება, მაგრამ თუ სხვა, დაჩაგრული კომპანიის მფლობელი ხმას არ ამოიღებს და სიმართლეს­ არ იტყვის, როგორ მოვიქცეთ? არც მე მომწონს, როცა ტენდერების შედეგების განხილვისას მუდმივად ერთ გამარჯვებულ კომპ­ანიას ვაწყდები, მაგრამ ხომ გეუბნებით, ჩემთან ჯერ არავინ მოსულა, დამეხმარეთ, ტენდერიდან უსამართლოდ გამომაგდესო“, - ამბობს ჯავახიშვილი „კვირის პალიტრასთან“ საუბარში.

ჯავახიშვილი პირობას დებს ასევე, რომ პირადად შეისწავლის გავრცელებულ ინფორმაციას, რომ ხშირად სამშენებლო კომპანიები გამგებლებთან არიან შეთანხმებული.

„ამ საკითხს პირადად შევისწავლი. თუ მსგავს­ი ინფორმაცია დადასტურდება, გარწმუნებთ, გამგებლების თავები დაიყრება! მეც მაქვს ინფორმაცია, რომ გამგებლების ნაწილი მამაძაღლობს, მაგრამ დასამტკიცებლად ფა­ქტები და კომპანიების დახმარება მჭირდება“, - ამბობს ჯავახიშვილი.

ნინო დათაშვილი