"წამლები მივუტანე, 5 დღე უნდა იწვეს" - ბერიძე კუდბასთან სტუმრობის მიზეზს განმარტავს

პოლიტიკა - 09:30, 09 Mar, 2015

1394

აჭარის უმაღლესი საბჭოს თავმჯდომარე ავთანდილ ბერიძე დეპუტატ სვეტლანა კუდბაზე ზეწოლას უარყოფს და განმარტავს, რომ მასთან მოსანახულებლად მივიდა.

ამის შესახებ ბერიძემ ჟურნალისტებთან საუბრისას განაცხადა.

მისი თქმით, კუდბას მან წამლები მიუტანა.

„სხდომაზე ქალბატონი სვეტლანა ვერ მოვა, რადგან 5 დღე უნდა იწვეს. მასზე ზეწოლას კატეგორიულად გამოვრიცხავ. მე არაფერი ვიცი, მას ვინ რას სთავაზობს, თუმცა დეპუტატობის დათმობა რაიმე ტიპის მაღალანაზღაურებად სამსახურზე სიცრუეა. ყოველ შემთხვევაში მე ამის შესახებ არაფერი ვიცი. სხდომა ორშაბათს იმიტომ ჩაინიშნა, რომ ასე დეპუტატებმა მოითხოვეს და მე კანონი მავალდებულებს სესია მოთხოვნიდან ორ დღეში დავნიშნო. მე საიდან უნდა მცოდნოდა, რომ "ნაციონალური მოძრაობის" დეპუტატები ქალაქში არ იმყოფებიან?! რაც შეეხება ვიცე-სპიკერის პოსტს, ჩვენ არ გვყავს კანდიდატი, ჩვენი ფრაქცია არ აყენებს დავით ბაციკაძის კანდიდატურას, თუმცა მე არ ვიცი რას იზამს მისი ფრაქცია", - განაცხადა ბერიძემ.

შეგახსენებთ, აჭარის უმაღლესი საბჭოს დეპუტატები მედეა ვასაძე და ჯემალ ფუტკარაძე დეპუტატ სვეტლანა კუდბას მიმართ ზეწოლაზე საუბრობენ. მათი ინფორმაციით, სწორდ ამ მიზნით იმყოფებოდა კუბდას სახლში უმაღლესი საბჭოს თავმჯდომარე .

როგორც ისინი ამბობენ, ავთანდილ ბერიძე კუდბას უმაღლესი საბჭოს რიგგარეშე სესიაზე მისვლას სთხოვდა.

მათი თქმით, სესიაზე კუდბას დასწრებით ქვორუმი შედგება და დეპუტატები ვიცესპიკერის კანდიდატურად ჯემალ ფუტკარაძეს ჩააგდებენ.