პრეზიდენტის მრჩეველი ეკონომიკურ საკითხებში გიორგი აბაშიშვილი ადმინისტრაციის გუშინდელ მოწოდებაზე მინისტრების შეფასებას ეხმაურება.

როგორც „ქრონიკის“ ეთერში აბაშიშვილმა განაცხადა, როგორც მინისტრები ისე პრეზიდენტის ადმინისტრაცია ვალდებულია ქვეყანაში შექმნილ ეკონომიკურ ვითარებაზე ინფორმაცია საზოგადოებას მიაწოდონ.

„როგორც მინისტრები, ისე ჩვენ, ყველა ანგარიშვალდებულები ვართ საზოგადოების წინაშე. ამიტომ მნიშვნელოვანია ვისაუბროთ არა ერთმანეთის მიმართ ანგარიშვალდებულებაზე, ერთმენთთან საუბარზე და შეხვედრებზე, არამედ გეგმის საზოგადოებისთვის წარდგენაზე. პრეზიდენტის თვითმიზანი არ არის ის, რომ ეს გეგმა პრეზიდენტის ადმინისტრაციაში წარმოადგინონ. ამ თვეების განმავლობაში, როდესაც სავალუტო კრიზისი შეინიშნებოდა, პრეზიდენტის მიზანი იყო, რომ მთავრობის ეკონომიკურ გუნდს და ეროვნულ ბანკს უფრო კოორდინირებული მუშაობა მოეხერხებინა და შემდგომ ეს ინფორმაციები საზოგადოებას მიწოდებოდა. ჩვენ გამოვიყენებთ ყველა საშუალებას, რომ საზოგადოება ინფორმირებული იყოს ეკონომიკური გუნდის მინისტრების და ეროვნული ბანკის მხრიდან. რა იწვევს აჟიოტაჟს? აჟიოტაჟს იწვევს არაინფორმირებულობა. ეს მაშინ ჩაცხრება როცა საზოგადოებას მეტი ინფორმაცია მიეწოდება“, - განაცხადა აბაშიშვილმა.

შეგახსენებთ, პრეზიდენტის მრჩეველის განცხადებით, გეგმა, რომელიც ეკონომიკურ გუნდს სავალუტო ფონდთან თანამშრომლობით უნდა შეემუშავებინა, ხუთი მარტისთვის უნდა ყოფილიყო მზად, თუმცა ეს ვადა დაირღვა.

ფინანსთა მინისტრის ნოდარ ხადურის თქმით, სავალუტო სტაბილიზაციის გეგმის წარმოდგენასთან დაკავშირებით ანგარიშვალდებული მთავრობის წინაშეა.