კახა კუკავამ ფოტოგრაფის ცემის ინციდენტში მონაწილე ბეგიაშვილი პარტიიდან გარიცხა

პოლიტიკა - 17:30, 05 Mar, 2015

1981

ვარდების მოედანზე გამართულ აქცია „შემოულაწუნეს“ ორგანიზატორებმა, „თავისუფალი საქართველოს“ ლიდერებმა კახა კუკავამ, ალექსანდრე შალამბერიძემ და ბეჟან გუნავამ სპეციალური ბრიფინგი გამართეს და განაცხადეს, რომ გუშინდელ აქციაზე მომხდარი დაპირისპირების მონაწილე გიორგი ბეგიაშვილი პარტია „თავისუფალი საქართველოდან“ გაირიცხა.

„მინდა გამოვეხმაურო გუშინ ჟურნალისტის მიმართ სასტიკი ანგარიშსწორების ფაქტს. კიდევ გავიმეორებ, კატეგორიულად ვგმობთ ნებისმიერ ძალადობას, მით უფრო ჟურნალისტის მიმართ.

ჩვენ გუშინვე დავადგინეთ პიროვნების ვინაობა, რომელიც იყო აღნიშნული ფიზიკური ანგარიშსწორების მონაწილე. იგი მამამისმა პირადად ჩააბარა თაბუკაშვილის ქუჩაზე მდებარე პოლიციის განყოფილებაში. შსს-მ გაავრცელა არასწორი ინფორმაცია, თითქოს დამნაშავე საგამოძიებო მოქმედებების შედეგად დააკავეს, ვითხოვთ, ეს უზუსტობა გამოსწორდეს.

პიროვნება, რომელიც ვიდეოჩანაწერში ჩანს არის გიორგი ბეგიაშვილი, რომელიც ჩვენი პარტიის წევრი იყო. რაც შეეხება პიროვნებას, რომელიც პირადად იღებდა მონაწილეობას ფიზიკურ ანგარისშწორებაში, ჩვენი პარტიის წევრი არ იყო.

ამ ფაქტის შემდგომ პარტიის პოლიტიკურმა საბჭომ მიიღო გადაწყვეტილება ბეგიაშვილის პარტიიდან გარიცხვის შესახებ, რამეთუ გუშინდელი ფაქტი შეუთავსებელია და არანაირი გამართლება აქვს, არა მხოლოდ პოლიტიკურად და სამართლებრივად, არამედ ადამიანურად და მორალურად. დაპირისპირების ეს ფორმა ჩვენი პარტიისთვის მიურებელია“, - განაცხადა კახა კუკავამ.

შეგახსენებთ, რომ ირაკლი გედენიძეს რესპუბლიკის მოედანზე მიმდინარე აქციის ერთ-ერთი მონაწილე ფიზიკურად გაუსწორდა. ირაკლი გედენიძის ცემის ფაქტზე, ჟურნალისტურ საქმიანობაში ხელის შეშლის ბრალდებით შსს-მ ერთი ადამიანია დააკავა.

ლაშა ჯაფარიძე