ფინანსთა მინისტრმა მთავრობის დღევანდელ სხდომაზე რეკომენდაციებიც წარმოადგინა, თუ რა ნაწილშიც ურჩევს მთავრობა სახელმწიფო სტრუქტურებს ხარჯების შემცირებას.

ნოდარ ხადურმა კიდევ ერთხელ განმარტა, რომ შემცირება არ შეეხება ფინანსურ და ინფრასტრუქტურულ ხარჯებს.

„ჩვენ რეკომენდაციით შემოვდივართ, რომ მინიმუმამდე დავიყვანოთ ადმინისტრაციული შენობების რემონტის ხარჯი, არ შევიძინოთ რბილი ავეჯი, მაქსიმალურად შევზღუდოთ ახალი სატრანსპორტო საშუალებების შეძენა, გარდა სპეციალური დანიშნულების სატრანსპორტო საშუალებებისა. დაახლოებით 30 პროცენტით შევამციროთ საწვავის ხარჯი, რაც რა თქმა უნდა, არ შეეხება ოპერატიულ მანქანებს. ასევე გთავაზობთ, რომ მინიმუმამდე იყოს შემცირებული მივლინებები, 20 პროცენტით შემცირდეს ე.წ. წარმომადგენლობითი ხარჯები და ამავე დროს სასწავლო შვებულებები გამოვიყენოთ მხოლოდ გადაუდებელი აუცილებლობის შემთხვევაში“, - განაცხადა ხადურმა.

მისივე თქმით, სახელმწიფო უწყებებს და მთავრობის დაქვემდებარებაში მყოფ საჯარო სამართლის იურიდიულ პირების ხარჯების შემცირების შესახებ ინფორმაციის წარმოდგენა არაუგვიანეს 16 მარტამდე დაევალათ.

ნინი კაციტაძე