პარლამენტის თავმჯდომარე დავით უსუფაშვილი საფრანგეთის პრეზიდენტის ფრანსუა ოლანდის განცხადებას ეხმაურება, სადაც ოლანდი ამბობს, რომ NATO ამ ეტაპზე არ უნდა გაფართოვდეს.

მისი თქმით, მსგავსი განცხადებები გავლენას ვერ მოახდენს იმ პროცესებზე, რომლის შინაარსი და არსი განსაზღვრულია ნატოსა და საქართველოს შორის დადებული შეთანხმებებით.

„რაც შეეხება ამ განცხადებას, რასაც აჟიოტაჟი მოჰყვა, შეგახსენებთ, რომ ამ „აღმოსავლეთ პარტნიორობის“ პროგრამაში გარდა იმ ქვეყნებისა, რომლებმაც უკვე მოაწრეს ხელი ასოცირების ხელშეკრულებას, არიან სხვა ქვეყნები, რომლებსაც ეს ნაბიჯი ჯერ არ გადაუდგამთ. ამიტომ, ჩვენ ნუ დავიყვანთ ყველაფერს რასაც ევროპაში ამბობენ, რომ ეს ეხება საქართველოს და საქართველოზეა საუბარი. ჩვენ უნდა ვიყოთ მყარად. ჩვენ გვაქვს ეს დოკუმენტი, გვაქვს ძალიან კონკრეტული სამოქმედო გეგმა და ამ მიმართულებით უნდა ვიაროთ. იგივეს ვიტყოდი ნატოსთან დაკავშირებულ საკითხებზე. ნატოში გადაწყვეტილებებს იღებს არა ერთი ქვეყანა, არამედ ყველა წევრი ქვეყანა და წევრი ქვეყნები ერთმანეთს ანგარიშს უწევენ გადაწყვეტილებების მიღების დროს. ჩვენ ნატოსთან გვაკავშირებს ასევე ძალიან მყარი შეთანხმება, ის პაკეტი შეთანხმების, რომელიც მივიღეთ უელსის სამიტზე, რომელიც ჩვენ აუცილებლად უნდა შევასრულოთ და წარვსდგეთ პირნათელი ჩვენს პარტნიორებთან 2016 წლის ნატოს სამიტისთვის. მანამდე ამ ტიპის მოსაზრებები, განცხადებები საქართველოში გაჟღერებული, თუ სხვა ქვეყნებში გაჟღერებული მივიღოთ როგორც მოსაზრებები, განცხადებები და პოზიციები, რომელიც ვერანაირ გავლენას თავად იმ პროცესზე ვერ მოახდენს, რომლის შინაარსი და არსი განსაზღვრულია ნატოსა და საქართველოს შორის დადებული შეთანხმებებით“, - განაცხადა დავით უსუფაშვილმა.

საფრანგეთის პრეზიდენტის ფრანსუა ოლანდის განცხადებით, ჩრდილო ატლანტიკური ალიანსი ამ ეტაპზე არ უნდა გაფართოვდეს. აღნიშნული განცხადება საფრანგეთის ლიდერმა NATO-ს გენერალურ მდივანთან იენს სტოლტენბერგთან შეხვედრისას გააკეთა.

ნინო დათაშვილი