ამერიკის შეერთებულ შტატებში ვიზიტით მყოფმი პარლამენტის თავმჯდომარე სამეზობლო პოლიტიკის გადახედვასთან დაკავშირებით ევროკავშირის გადაწყვეტილებას ეხმაურება.

უსუფაშვილის თქმით, ევროკავშირთან და სამეზობლო პოლიტიკასთან დაკავშირებით, საქართველო ფეხზე მყარად დგას.

„ევროკავშირთან დაკავშირებით და სამეზობლო პოლიტიკასთან დაკავშირებით, ჩვენ ძალიან მყარად ვდგავართ ფეხზე. ყველას შევახსენებ, ვინც ამ ამბავმა რაღაცნაირად შეაშფოთა, რომ საქართველოს ევროკავშირთან აკავშირებს იურიდიული დოკუმენტი - ამას ჰქვია „ასოცირების შეთანხმება“ და იმ შეთანხმებაში რაც წერია, ცხადია, შესრულდება საქართველოს მხრიდანაც და ევროპის მხრიდანაც. ასოცირების შეთანხმებით გათვალისწინებული ღონისძიებების განხორციელება ეს არის სწორედ ის გზა, რაზეც ჩვენ შევუთანხმდით ევროკავშირს და რაც გაგრძელდება, რომლის შეცვლას და გადახედვას არავინ აპირებს“, - განაცხადა უსუფაშვილმა.

ევროკავშირი სამეზობლო პოლიტიკის გადახედვას აპირებს. ამის შესახებ ოფიციალური განცხადება ბრიუსელში გამართულ პრესკონფერენციაზე უმაღლესმა წარმომადგენელმა, ფედერიკა მოგერინიმ გააკეთა.