მხოლოდ აშშ-ს სწრაფი და დროული ქმედება შეძლებს პუტინის სტრატეგიის შეჩერებას

მხოლოდ აშშ-ს სწრაფი და დროული ქმედება შეძლებს პუტინის სტრატეგიის შეჩერებას - სააკაშვილი

პოლიტიკა - 10:40, 05 Mar, 2015

2428

საქართველოს მესამე პრეზიდენტი მიხეილ სააკაშვილი შეერთებული შტატების სენატის საგარეო ურთიერთობების კომიტეტის ევროპისა და რეგიონული უსაფრთხოების თანამშრომლობის ქვეკომიტეტში სიტყვით გამოვიდა.

პრეზიდენტ პოროშენკოს მრჩეველთა საბჭოს თავმჯდომარე მიხეილ სააკაშვილმა აშშ-ს სენატის საგარეო ურთიერთობათა კომიტეტის სხდომაზე აშშ-ს მხრიდან უკრაინელებისთვის სწრაფი და ეფექტური დახმარების საჭიროებაზე ისაუბრა.

„შეიძლება უჩვეულო იყოს, როცა ერთი ქვეყნის პრეზიდენტი ამერიკის სენატის წინაშე სხვა ქვეყნის ინტერესებს იცავს, მაგრამ უკრაინა და საქართველო ახლა იმ ფრონტის წინა ხაზზე არიან, რომელიც, შესაძლოა, აქედან შორს ჩანდეს, თუმცა რუსეთის აგრესიასა და ამერიკას შორის ახლა სწორედ უკრაინა დგას" - განაცხადა სააკაშვილმა და ხაზი გაუსვა იმას რომ ამერიკის მხრიდან თავდაცვითი იარაღის მიწოდება უკრაინისთვის სასიცოცხლოდ მნიშვნელოვანია. სააკაშვილმა წარადგინა ფოტომასალა უკრაინის აღმოსავლეთიდან, სადაც რუსული შეიარაღების არსებობაა დაფიქსირებული.

„საქართველო და უკრაინა წინა ხაზზე იმყოფება იმ ომში რომელიც აქედან შორს მიმდინარეობს უკრაინელები ითხოვენ რამდენიმე ათას ანტისატანკო საშუალებას, თავის დასაცავად და ასეთ დროს მათი დახმარება ნიშნავს უკრაინული დემოკრატიის დაცვას. პუტინის მმართველობის ნიშანს მისი ოპონენტების საფლავები წარმოადგენს. მთელი თავისი მმართველობის განმავლობაში ის ცდილობს კონტროლის გაზრდას რუსეთზე და რუსულენოვან სამყაროზე. პუტინის სამხედრო სვლები ყოველთვის შესავალია მისი პირადი ძალაუფლების ცენტრალიზაციის პროცესისა. ამან რუსეთი გახადა არაპროგნოზირებადი, ხოლო ევროპა და შეერთებული შტატები ნაკლებად დაცული. ოპონენტები ამბობენ , რომ უკრაინის მომარაგება საბრძოლო იარაღით რუსეთის პროვოცირება იქნება რათა გაზარდოს კონფლიქტის ესკალაცია, თუმცა პუტინის მიზანი არის უკრაინის დემოკრატიის დესტაბილიზაცია, ადეკვატურ ძალას კი შეუძლია აგრესიის შეჩერება. მხოლოდ სწრაფი და დროული ქმედება შეერთებული შტატების მხრიდან უკრაინელების წვრთნისა და აღჭურვისთვის შეძლებს პუტინის სტრატეგიის შეჩერებას, რომელიც ევროპისა და ტრანსატლანტიკური არქიტექტურის დაშლას ისახავს მიზნად,“- განაცხადა სააკაშვილმა.

კომიტეტებში გამართული სხდომის მთავარი საკითხი რუსეთის მხრიდან მომავალი საფრთხეები, ხოლო სხდომის სახელწოდება "რუსეთის აგრესია აღმოსავლეთ ევროპაში - რა მიმართულებით წავა პუტინი საქართველოს, უკრაინის და მოლდოვის შემდეგ" იყო.

უკრაინაზე მოხსენების შემდეგ დარბაზში დებატებიც გაიმართა, საქართველოს მესამე პრეზიდენტს შეკითხვა 2008 წელს რუსეთთან ომის შესახებ დაუსვეს. სააკაშვილის თქმით, პუტინი მაშინ სწორედ ამერიკული სამხედრო ხომალდების საქართველოს პორტში შემოსვლამ შეაჩერა.

მიხეილ სააკაშვილმა უკრაინაში მყოფ ქართველებზეც ისაუბრა და განაცხადა, რომ ქართველი სამხედროები უკრაინელებს სეპატარისტების წინააღმდეგ ბრძოლაში, ხოლო ქართველი ყოფილი მაღალჩინოსნები უკრაინის ხელისუფლებას ქვეყანაში რეფორმების გატარებაში ეხმარებიან.

_{ნინო ზედგენიძე}