„თავისუფალი საქართველოს“ ლიდერი კახა კუკავა, რომელიც ორგანიზაბითაც ექსპრემიერის რეზიდენციასთან აქცია იმართება, ფოტოგრაფ ირაკლი გედენიძის ცემის ფაქტს ეხმაურება.

მისი თქმით, ეს არის პროვოკაცია აქციის მიმართ.

„კატეგორიულად მიუღებელია ნებისმიერი ადამიანის და მითუმეტეს ჟურნალისტის წინააღმდეგ ფიზიკური ანგარიშწორება. ეს არის პროვოკაცია არა მარტო გედენიძის, არამედ აქციის წინააღმდეგ. დეტალებს გავარკვევთ უახლოეს პერიოდში“, - აცხადებს კუკავა.

გედენიძესა და აქციის მონაწილეებს შორის დაპირისპირება რესპუბლიკის მოედანზე ცოტა ხნის წინ მოხდა. ადგილზე რამდენიმე პოლიტიკური ძალის წარმომადგენლები იკრიბებოდნენ. ამ დროისთვის მათ ექსპრემიერის ბიძინა ივანიშვილის რეზიდენციასთან გადაინაცვლეს.

აქცია სახელწოდებით „შემოულაწუნე“ „თავისუფალი საქართველ“ ორგანიზებით იმართება. მასში მონაწილეობას იღებენ ასევე „პოლიტიკური გაერთიანება რეფორმატორები“, „ქრისტიან-დემოკრატები“ და „სოციალ-დემოკრატები. მათ ცოტა ხნის წინ იპოთეკით დაზარალებულებიც შეუერთდნენ.