"ქონების ნაწილი, რომლის ჩამორთმევაც უკანონოდ მოხდა, ჯერ კიდევ სახელმწიფოს ბალანსზეა"

პოლიტიკა - 15:04, 04 Mar, 2015

1250

იუსტიციის მინისტრმა თეა წულუკიანმა სამართალწარმოების პროცესში ჩადენილ დანაშაულის გამოძიების დეპარტამენტის პრეზენტაციის შემდეგ წინა ხელისუფლების პირობებში დაზარალებულ ადამიანებისთვის კონპენსაციის გადახდის საკითხზე ისაუბრა.

წულუკიანის განცხადებით, შესაძლებელია ბევრი საქმე მცირე ფინანსური დანახარჯით მოგვარდეს. მისი თქმით, იმ ქონების ნაწილი, რომლის ჩამორთმევაც უკანონოდ მოხდა, ჯერ კიდევ სახელმწიფოს ბალანსზეა.

„ხდებოდა სახელმწიფოს ხელით ქონების ჩამორთმევა, რასთან დაკავშირებითაც რამდენიმე ასეული საქმე არსებობს. მეორე მხრივ, კარგია ის, რომ არაერთი ქონება, თუ არა უმრავლესობა, ჯერ კიდევ სახელმწიფოს ხელშია და ეკონომიკის სამინისტრო იმუშავებს იმისთვის, რომ დაზარალებულებს უფლებები პირველ რიგში ამ ნაწილში აღუდგეს. საქმეების დახარისხება აჩვენებს, რომ არის მრავალი საქმე, რომელიც შეიძლება იყოს ნაკლები ფინანსური დანახარჯით მოგვარებული. ვგულისხმობ, სწორედ ამ ტიპის საქმეებს, რომელიც ეხება უკანონოდ ჩამორთმეულ ქონებებს", - განაცხადა თეა წულუკიანმა.

შეგახსენებთ, რომ მთავარ პროკურატურაში სამართალწარმოების პროცესში ჩადენილი დანაშაულის გამოძიების დეპარტამენტი შეიქმნა, რომელსაც პროკურორი ირაკლი ნადარეიშვილი უხელმძღვანელებს.