ხელისუფლებამ სავალუტო კრიზისთან დაკავშირებულ განხილვაში მონაწილეობა არ მიიღო

პოლიტიკა - 15:28, 02 Mar, 2015

1977

ლარის კურსის ვარდნასთან და შექმნილ სავალუტო კრიზისთან დაკავშირებით, ჟურნალ Business Time Georgia-ს ანალიტიკური სამსახურის ორგანიზებით, მრგვალი მაგიდის სხდომა გაიმართა. იმისდა მიუხედავად, რომ ხელისუფლებამ შეხვედრის ორგანიზატორებს პირობა მისცა, აღნიშნულ მრგვალ მაგიდას დაესწრებოდა, არც ეკონომიკის და არც ფინანსთა სამინისტროს წარმომადგენლები შეხვედრაზე არ მივიდნენ.

როგორც ჟურნალ Business Time Georgia-ს რედაქტორი ლევან ჭითანავა „ნიუპოსტთან“ საუბარში აცხადებს, ხელისუფლების უარი მათთვისაც გაუგებარია.

„მთელი ერთი კვირის განმავლობაში ჩვენ ვმუშაობდით ეკონომიკის და ფინანსთა სამინისტროსთან. ფინანსთა სამინისტროსგან ჩვენ გვქონდა დასტური, რომ შეხვედრაში მონაწილეობას მიიღებდა მინისტრის მოადგილე- გიორგი კაკაურიძე, თუმცა ბოლო წუთს განაცხადეს, რომ ის მონაწილეობას ვეღარ მიიღებდა, რადგან პრემიერთან მოულოდნელი შეხვედრა დაიგეგმა. ეკონომიკის სამინისტროსგან კი საერთოდ პასუხი ვერ მივიღეთ“- აცხადებს ჭითანავა.

Business Time Georgia-ს რედაქტორის განცხადებით შეკრების მიზანი ხელისუფლების წარმომადგენლებსა და არასამთავრობო სექტორს შორის მეტი კომუნიკაცია და იმ კითხვებზე პასუხის გაცემა იყო, რომელიც ეკონომიკური გუნდის მიმართ არასამთავრობო სექტორს და საზოგადოებას გააჩნია.

"კითხვები კითხვებად დარჩა და ხელისუფლებამ მასზე პასუხი არ ისურვა."- განცხადა ჭითანავამ.

მისი თქმით, საქართველოს ეკონომიკაში არსებული პრობლემების გადასაჭრელად ხელისუფლების წარმომადგენლებსა და არასამთავრობო სექტორს შორის მეტი კომუნიკაციაა საჭირო.