„ახალი მემარჯვნეები“ რუსი ოპოზიციონერის ბორის ნემცოვის მკვლელობას ეხმაურებიან და ფატქს შემზარავს უწოდებენ. როგორც პარტიის მიერ გავრცელებულ განცხადებაშია ნათქვამი, „ახალი მემარჯვენეებისთვის“ ნემცოვი იყო კარგი პოლიტიკური პარტნიორი და მეგობარი.

„დღევანდელ რუსეთში ბორის ნემცოვის მკვლელობის ფაქტი ერთდროულად შემზარავი მოულოდნელობაც არის და უკიდურესად ტრაგიკული ბანალობაც.

შემზარავია, რომ რეჟიმმა კიდევ ერთი თავისუფლებისათვის დაუცხრომელი მებრძოლი სული შეიწირა.

სამწუხაროდ, ბანალურია იმით ეს მკვლელობა, რომ დღეს პუტინის რუსეთში შექმნილი პოლიტიკურ–იდეოლოგიური რეალობა ითხოვს ამგვარ მსხვერპლს.

მაშინ, როცა ისევ იბომბება უკრაინის ტერიტორია, ისევ იღუპებიან უკრაინელი ჯარისკაცები რუსული ტყვიებით, ნაღმებით, ყუმბარებით, ნემცოვის მკვლელობა, არის ერთი შეხედვით, აგონიური, მაგრამ რეალურად ძალიან ცხადი, ცინიკური გზავნილი რუსული და უფრო მეტად საერთაშორისო საზოგადოებისთვის, რომ პუტინის რუსეთი გაჩერებას არ აპირებს.

დღეს, შესაძლოა ხშირად ისმის კითხვა, ვინ და ვისი დაკვეთით განახორციელა ეს შემზარავი მკვლელობა, მაგრამ ძალიან ცოტა ვინმე თუ კამათობს იმაზე, რომ ეს განაპირობა რეჟიმმა.

ნემცოვი ყველა დემოკრატი და თავისუფლებისმოყვარე ადამიანისთვის რუსეთშიც და მის გარეთაც იყო საიმედო და სანდო მოკავშირე.

ბორის ნემცოვი ჩვენთვის, „ახალი მემარჯვენეებისთვის“ იყო კარგი პოლიტიკური პარტნიორი და მეგობარი.

ძალიან სამწუხაროა, რომ რუსეთში, განსაკუთრებით კი რუსულ პოლიტიკაში, ტრაგიკულად მცირდება იმ ადამიანთა რიცხვი, ვისთანაც მომავალში ცივილიზებული, პარტნიორული ურთიერთობა იქნება შესაძლებელი“, - ნათქვამია განცხადებაში.