,,ნემცოვი რუსეთის პუტინისგან გათავისუფლებისთვის გმირულად დაიღუპა"

,,ნემცოვი რუსეთის პუტინისგან გათავისუფლებისთვის გმირულად დაიღუპა" - ენმ

პოლიტიკა - 17:17, 28 Feb, 2015

1658

„ერთიანი ნაციონალური მოძრაობა“ რუსი ოპოზიციონერი პოლიტიკოსის, ბორის ნემცოვის მკვლელობის ფაქტზე მწუხარებას გამოთქვამს და განცხადებას ავრცელებს. „ნაციონალური მოძრაობის“ განცხადებაში ნათქვამია, რომ ეს არ არის პირველი შემთხვევა, როდესაც პუტინის რეჟიმთან დაპირისპირებულ მოღვაწეს კლავენ და ბორის ნემცოვი იყო ლიდერი, რომელიც რუსეთის ლიბერალიზაციისა და დემოკრატიზაციისთვის იბრძოდა

„ერთიანი ნაციონალური მოძრაობა ღრმა მწუხარებას გამოხატავს ბორის ნემცოვის ტრაგიკული გარდაცვალების გამო. ეს არ არის პირველი შემთხვევა, როცა პუტინის რეჟიმთან დაპირისპირებულ მოღვაწეს კლავენ და როგორც სხვა შემთხვევებში, ახლაც ნაკლებად სავარაუდოა, რომ დამკვეთებსა და შემსრულებლებს დაადგენენ. ბორის ნემცოვი ერთერთი გამორჩეული ლიდერი იყო, რომელიც რუსეთის ლიბერალიზაციისა და დემოკრატიზაციისთვის იბრძოდა - სურდა ცივილიზებული, კარგი ურთიერთობა მეზობლებთან, მათ შორის საქართველოსთან. ის იყო უკრაინის ერთიანობისა და სუვერენიტეტის აქტიური მხარდამჭერი. ვინც არ უნდა იკოს კონკრეტული მკვლელი - ცხადია - ბორის ნემცოვი რუსეთის თავისუფლებისთვის და პუტინის რეჟიმისგან გათავისუფლებისთვის გმირულად დაიღუპა. ვუსამძიმრებთ მის ოჯახს, ახლობლებს, თანამოაზრეებს და თავისუფლების მოყვარე ყველა მოქალაქეს რუსეთში“,-ნათქვამია „ერთიანი ნაციონალური მოძრაობის? მიერ გავრცელებულ განცხადებაში.

ოპოზიციონერი პოლიტიკოსი ბორის ნემცოვი მოსკოვის ცენტრში წუხელ ჩაცხრილეს.