რუმინეთის პრემიერმა ღარიბაშვილს ნატოსთან შეთანხმების დოკუმენტზე ხელმოწერა უსურვა

პოლიტიკა - 18:23, 27 Feb, 2015

1384

საქართველოს და რუმინეთის პრემიერ მინისტრებმა ერთობლივი ბრიფინგი გამართეს და ორი ქვეყანას შორის არსებულ მეგობრულ ურთიერთობებზე ისაუბრეს. რუმინეთის პრემიერ-მინისტრმა ვიქტორ პონტამ ქართველ კოლეგას უსურვა გახდეს პირვბელი პრემიერ-მინისტრი, რომელიც ნატო-სთან შეთანხმებას მოაწერს ხელს.

რუმინეთის მთავრობის მეთაურმა ირაკლი ღარიბაშვილს საქართველოს ევროატლანტიკური მისწრაფებებისადმი მტკიცე მხარდაჭერა კიდევ ერთხელ დაუდასტურა, ვიზიტისთვის მადლობა გადაუხადა და ორი ქვეყნის მეგობრული ურთიერთობების კიდევ უფრო გაღრმავების იმედი გამოთქვა.

საქართველოს პრემიერ-მინისტრმა რუმინელ კოლეგას მასპინძლობისთვის მადლობა გადაუხადა და აღნიშნა, რომ ევროპული ინტეგრაცია და ნატო-ში გაწევრიანება მთავრობის პრიორიტეტებია.

„ჩვენ დავადასტურეთ ჩვენი ურყევი გადაწყვეტილება, ევროკავშირში ინტეგრაციის დღის წესრიგით გათვალისწინებული რეფორმების წარმატებით განხორციელებასთან დაკავშირებით, რაც მოგვცემს საშუალებას, სიამაყით წარვადგინოთ ხელშესახები შედეგები რიგის სამიტზე, როგორც ევროკავშირის სანდო პარტნიორმა", - განაცხადა ირაკლი ღარიბაშვილმა.

შეხვედრების ერთ-ერთი ძირითადი თემა იყო საქართველოს ოკუპირებულ ტერიტორიებზე არსებული მდგომარეობა და რეგიონული საფრთხეები. პრემიერ-მინისტრმა რუსეთის მიერ აფხაზეთისა და ცხინვალის საოკუპაციო რეჟიმებთან ე.წ შეთანხმებების გაფორმება საქართველოს ოკუპირებული რეგიონების ანექსიის მცდელობად შეაფასა და რუმინეთს ამ მიმართულებით მტკიცე მხარდაჭერისთვის მადლობა გადაუხადა.

მხარეები ორ ქვეყანას შორის სავაჭრო ბრუნვის გაზრდის, ბიზნესაქტივობის გაფართოებისა და საინვესტიციო შესაძლებლობების ხელშეწყობის მიზნით მჭიდრო თანამშრომლობაზე შეთანხმდნენ.