ეროვნული ბანკის პრეზიდენტის გიორგი ქადაგიძის თქმით, მან არ იცის რა იყო ბიძინა ივანიშვილის განცხადებაში მისი და ეროვნული ბანკის მუშაობის გაკრიტიკების მოტივი.

„მე არ ვიცი განცხადების მოტივი რა იყო, მე არ ვიცი რას უკავშირდებოდა ეს, ერთი რამე შემიძლია გითხრათ, რომ ჩვენ ვაგრძელებთ მუშაობას ისე როგორც ვმუშაობდით მანამდე.“- განაცხადა გიორგი ქადაგიძემ ჟურნალისტის შეკითხვის საპასუხოდ, უკავშირდებოდა თუ არა ივანიშვილის წერილი ბანკ „ქართუსთან“ დაკავშირებით ძველი წყენას.

შეგახსენებთ, რომ გუშინ, ბიძინა ივანიშვილიმა ქვეყნის სავალუტო კრიზისამდე მიყვანაში, პირადად ეროვნული ბანკის პრეზიდენტი დაადანაშაულა. როგორც ყოფილი პრემიერი ამბობს, ეროვნულ ბანკს აქვს ბერკეტი უზრუნველყოს ეროვნული ვალუტის სტაბილურობა და ლარის გაცლითი კურსი 2.0 ლარს არ უნდა აღემატებოდეს. ივანიშვილმა გიორგი ქადაგიძეს კონსტიტუციური მოვალეობების შესრულებისკენ მოუწოდა.

ლარის კურსთან დაკავშირებით ბიძინა ივანიშვილის სპეციალური განცხადება "საზოგადოება 20/30"-მა გუშინ გაავრცელა. ივანიშვილის ბრალდება ეროვნული ბანკის პრეზიდენტის მიმართ, ხელისუფლების და უმრავლესობის ნაწილმაც გაიზიარა, მათ შორის იყო, მთავრობის ეკონომიკური გუნდის წარმომადგენელი, მინისტრი გიორგი კვირიკაშვილიც.

_{ნინო ზედგენიძე}