ეროვნული ბანკის პრეზიდენტი გიორგი ქადაგიძე, მისი და მისი უწყების მისამართით ზოგიერთი ეკონომიკური ექსპერტის მხრიდან გამოთქმულ კრიტიკასაც გამოეხმაურა:

„ნუ გავაუფასურებთ სიტყვა ექსპერტს, ძალიან საეჭვო რეპუტაციის ადამიანები აკეთებენ აბსოლუტურად არაადეკვატურ, მცდარ და ცრუ განცხადებებს, ამიტომ ჩემთვის კომენტარიც კი რთულია, ისეთ განცხადებებზე, რომელიც ყველანაირ საფუძველს არის მოკლებული“- განაცხადა ქადაგიძემ და აღნიშნა, რომ ეროვნული ბანკის აუდიტს საერთაშორისო აუდიტორიული კომპანია ახორციელებს, რომელიც ეროვნული ბანკის მუშაობას დადებითად აფასებს და წლების განმავლობაში არანაირი გადაცდომა არ ყოფილა.

შეგახსენებთ, რომ გუშინ, ბიძინა ივანიშვილიმა ქვეყნის სავალუტო კრიზისამდე მიყვანაში, ეროვნული ბანკის პრეზიდენტი დაადანაშაულა. როგორც ყოფილი პრემიერი ამბობს, ეროვნულ ბანკს აქვს ბერკეტი უზრუნველყოს ეროვნული ვალუტის სტაბილურობა და ლარის გაცლითი კურსი 2.0 ლარს არ უნდა აღემატებოდეს. ივანიშვილმა გიორგი ქადაგიძეს კონსტიტუციური მოვალეობების შესრულებისკენ მოუწოდა.

ლარის კურსთან დაკავშირებით ბიძინა ივანიშვილის სპეციალური განცხადება "საზოგადოება 20/30"-მა გუშინ გაავრცელა. ეროვნული ბანკის პრეზიდენტის მიმართ ივანიშვილის ბრალდება, ხელისუფლების და უმრავლესობის ნაწილმაც გაიზიარა, მათ შორის, მთავრობის ეკონომიკური გუნდის წარმომადგენელმა, მინისტრმა გიორგი კვირიკაშვილმა.

_{ნინო ზედგენიძე}