ეროვნული ბანკის პრეზიდენტმა გიორგი ქადაგიძემ მისი და მისი უწყების მიმართ გამოთქმულ კრიტიკას საგანგებო ბრიფინგზე უპასუხა. ქადაგიძის თქმით ბოლო პერიოდში ეროვნული ბანკის წინააღმდეგ მიზანმიმართული ცილისმწამებლური კამპანია იწარმოება თუმცა ქადაგიძემ მისი მხრიდან პოლიტიკურ დებატებში ჩართვა გამორიცხა.

"საზოგადოებამ კარგად იცის, რომ ჩვენ არ ვაკეთებთ პოლიტიკურ კომენტარებს იმ თავდასხმებზე რომელიც ხორციელდება ეროვნული ბანკის მისამართით და არც მომავალში ვაპირებთ პოლიტიკურ დებატებში ჩართვას."- განაცხადა ქადაგიძემ.

გიორგი ქადაგიძის განცხადებით, მთავრობა ეროვნული ბანკის რეკომენდაციებს არ ითვალისწინებდა, მისი თქმით ეროვნულმა ბანკმა არაერთხელ მიმართა მთავრობას, რომ ადგილი ქონდა არათანაბარ ხარჯვას, რაც წარმოადგენდა პრობლემას და იმოქმედებდა გაცვლით კურსზე. თუმცა ეროვნული ბანკის პრეზიდენტის განცხადებით მთავრობამ ეს პროგნოზები არ გაითვალისწინა.

ქადაგიძის თქმით ეროვნული ბანკის არგუმენტების საპასუხოდ ისინი იღებდნენ შეკვეთილი სტატიების ნიაღვარს, სადაც ეროვნულ ბანკს საბოტაჟში ადანაშაულებდნენ.

ქადაგიძის განმარტებით, სრული პასუხისმგებლობის ეროვნულ ბანკზე დაკისრება და ის მიდგომა, თითქოს რეზერვების ხარჯვა არის გამოსავალი არასწორია:

„რეზერვებით ფუნდამენტური ეკონომიკური ფაქტორების ჩანაცვლება, კონკრეტულად კი ექსპორტის და ტურიზმის ჩანაცვლება არა მარტო არასწორი ეკონომიკური გადაწყვეტილება, არამედ კონტრპროდუქტიული და უშედეგოა“- განაცხადა ქადაგიძემ.

შეგახსენებთ, რომ გუშინ, ბიძინა ივანიშვილიმა ქვეყნის სავალუტო კრიზისამდე მიყვანაში, ეროვნული ბანკის პრეზიდენტი დაადანაშაულა. როგორც ყოფილი პრემიერი ამბობს, ეროვნულ ბანკს აქვს ბერკეტი უზრუნველყოს ეროვნული ვალუტის სტაბილურობა და ლარის გაცლითი კურსი 2.0 ლარს არ უნდა აღემატებოდეს. ივანიშვილმა გიორგი ქადაგიძეს კონსტიტუციური მოვალეობების შესრულებისკენ მოუწოდა.

ლარის კურსთან დაკავშირებით ბიძინა ივანიშვილის სპეციალური განცხადება "საზოგადოება 20/30"-მა გუშინ გაავრცელა.

_{ნინო ზედგენიძე}