ეროვნული ბანკის პრეზიდენტი არწმუნებს მოსახლეობას, რომ ქვეყნის ფინანსურ სტაბილურობას საფრთხე არ ემუქრება.

ამის შესახებ ქადაგიძემ ჟურნალისტებთან საუბრისას განაცხადა.

„ჩვენ არაერთხელ დაგვიშვია შეცდომები 90-იან წლებში და იგივე შეცდომების დაშვებას არ ვაპირებთ. ვარწმუნებ მოსახლეობას, რომ ქვეყნის ფინანსურ სტაბილურობას საფრთხე არ ემუქრება. სანამ მე და ჩემი გუნდი ეროვნული ბანკის სათავეში ვართ, არ გავიმეორებთ იგივე შეცდომებს, რაც ჩვენმა ქვეყანამ გაიმეორა არაერთხელ“, - განაცხადა ქადაგიძემ.

ქადაგიძემ კიდევ ერთხელ განმარტა, რომ ლარის კურსის გაუფასურება შეამცირებს იმპორტს. თუმცა აღნიშნა, რომ დღეისათვის ლარს, გამყარების მიმართულება აქვს.

„გაუგებარია გუშინდელი განცხადება. გუშინდელი განცხადებების კასკადამდე სავალუტო აუქციონზე გარიგებები დასრულდა 2,16 კურსით, რაც მიუთითებს სავალუტო კურსის სტაბილიზაციაზე და იმაზე, რომ ყველაფერი სწორედ მიდის. კურსთან დაკავშირებით კიდევ ერთხელ ვამბობს, რომ ლარის კურსის გაუფასურება ფუნდამენტური ეკონომიკური ფაქტორებით არის გამოწვეული. ლარი 30%-ით გაუფასურდა, რამაც გარკვეული პერიოდის მერე ასახვა დაიწყო იმპორტზე, შესაბამისად ველოდებით იმპორტის შემცირებას, რაც შეამცირებს ნეგატიურ გავლენას კურსზე, რაც შეამცირებს მოთხოვნას უცხოურ ვალუტაზე და ლარს სტაბილიზაციის და გამყარების ტენდენცია ექნება“, - განაცხადა ქადაგიძემ.

ნინო დათაშვილი