საქართველოს პრემიერ-მინისტრი ირაკლი ღარიბაშვილი დღეს ოფიციალური ვიზიტით რუმინეთს ეწვევა.

ბუქარესტში მთავრობის სახლში დახვედრის ოფიციალური ცერემონია გაიმართება, რის შემდეგაც საქართველოს პრემიერს რუმინელი კოლეგა, ვიქტორ პონტა უმასპინძლებს. შეხვედრის დასრულების შემდეგ დაგეგმილია ორი ქვეყნის მთავრობის წევრების გაფართოებული მოლაპარაკებები. საქართველოსა და რუმინეთის პრემიერ-მინისტრები მედიისთვის ერთობლივ განცხადებებსაც გააკეთებენ.

ვიზიტის ფარგლებში ირაკლი ღარიბაშვილი რუმინეთის სენატის პრეზიდენტს, კალინ პოპესკუ-ტარიჩეანუს და დეპუტატთა პალატის პრეზიდენტ ვალერიუ სტეფან ზგონეას შეხვდება.

საქართველოს დელეგაციის შემადგენლობაში, რომელსაც პრემიერ-მინისტრი ირაკლი ღარიბაშვილი ხელმძღვანელობს, საგარეო საქმეთა მინისტრი თამარ ბერუჩაშვილი და სოფლის მეურნეობის მინისტრი ოთარ დანელია შედიან.