კრემლის უტიფარი ულტმატუმების მოსმენის დრო გავიდა

კრემლის უტიფარი ულტმატუმების მოსმენის დრო გავიდა - სოსო ცისკარივშვილი

პოლიტიკა - 22:57, 26 Feb, 2015

2268

აბაშიძე-კარასინის ფორმატში რკინიგზის აღდგენაზე საუბარს კრემლი ულტიმატუმს უწოდებს ექსპერტი სოსო ცისკარიშვილი, რომლის თქმითაც, აღნიშნული თემა კრემლის კულუარებში განიხილებოდა.

"მე მგონი ჩაიშლებოდა პრაღაში ეს შეხვედრა, იმდენჯერ ვახსენეთ აბაშიძე და კარასინი, რომ ალბათ სლოკინისგან ვეღარ მოახერხებდნენ საუბრის გაგრძელებას. ჩემთვის კითხვას წარმოადგენს ის ფაქტი, რომელიც თავდაპირველად გაჟღერდა, რომ ამ შეხვედრის მთავარი საკითხი იქნებოდა ის, რომ შვეიცარიული კომპანიის მიერ დაწყებულიყო იმ გადაწყვეტილების შესრულება, რა პირობაც რუსეთმა 4 წლის წინ დადო და ჯერაც არაფერი გაუკეთებია. ჩემთვის უფრო საკვირველია ის, რომ არც ყოფილი და არც მოქმედი ხელისუფლება, საერთოდ არ სვამდნენ ამ კითხვას, არ ახსენებდნენ რუსეთს ასეთ ვალდებულებას. უცებ აღმოჩნდა, რომ ეს თემა მთავარია ამ მოლაპარაკებებში. მაგრამ ძირითადი, ჩემი აზრით, არის ის, რაც კულუარებში არსებობს და არა მხოლოდ კულუარებში, ღია მედიაშიც იყო ამაზე საუბარი, რომ მორიგი უტიფარი ულტიმატუმი წაგვიყენა კრემლმა. კერძოდ, თუ გვინდა, რომ მათ შეასრულონ ეს ვალდებულება, თურმე სანაცვლოდ უნდა გაიხსნას სარკინიგზო მიმოსვლა მარშრუტით მოსკოვი-სოხუმი-თბილისი-ერევანი. მე მგონი, გავიდა დრო ამ ულტიმატუმების მოსმენის", - განაცხადა სოსო ცისკარიშვილმა.

ექსპერტის თქმით, სარკინიგზო მიმოსვლასთან დაკავშირებით მნიშვნელოვანია მეზობელი აზერბაიჯანის ინტერესების გათვალისწინება.

,,თუ რაიმე სიკეთე ეგულება აფხაზეთთან სარკინიგზო მიმოსვლაში, მაშინ მიღებულ იქნას შეთანხმება, მარშრუტზე მოსკოვი-სოხუმი-ფოთი. ეს უფრო მეტი ინტერესის მქონე იქნება საქართველოსთვის, მით უმეტეს, არ უნდა დავივიწყოთ, რომ ერთ-ერთი დაინტერესებული სუბიექტი ასეთი ტრასის არსებობა-არარსებობაში გახლავთ ჩვენი კეთილი მეზობელი აზერბაიჯანის სახით. თუ ის არ იქნა ასევე ჩართული ამ პროექტის განხორციელებაში, ჩვენ არ ვიცი, რას მივიღებთ, მაგრამ აზერბაიჯანს დავკარგავთ", - განაცხადა სოსო ცისკარიშვილმა.