უკრაინა მტკიცედ გმობს რუსეთსა და ე.წ. სამხრეთ ოსეთს შორის „სახელმწიფო საზღვრის შესახებ“ ე.წ. შეთანხმების ხელმოწერას და თვლის, რომ ეს არის ევროპის საერთაშორისოდ აღიარებული საზღვრების ძალადობრივი შეცვლის მორიგი მცდელობა.

ამის შესახებ უკრაინის საგარეო საქმეთა სამინისტროს მიერ გავრცელებულ განცხადებაშია ნათქვამი.

„საქართველოს ტერიტორიული მთლიანობის და სუვერენიტეტის დარღვევა, ყირიმის ავტონომიური რესპუბლიკის ანექსია და უკრაინის აღმოსავლეთში მიმდინარე აგრესია უხეშად არღვევს საერთაშორისო სამართლის ნორმებსა და პრინციპებს, ძირს უთხრის სტაბილურობას აღმოსავლეთ ევროპისა და შავი ზღვის რეგიონებში, წარმოადგენს საფრთხეს სრულიად ევროპისათვის და იწვევს ათასობით ადამიანის დაღუპვას.

უკრაინა მოუწოდებს რუსეთის ფედერაციას შეწყვიტოს საერთაშორისო ურთიერთობებში რევიზიონიზმის მიზანმიმართული პრაქტიკა, უკანონო ფსევდო წარმონაქმნების პოლიტიკური, ეკონომიკური და სამხედრო მხარდაჭერა და დაუბრუნდეს გაერო-ს წესდების, ჰელსინკის შემაჯამებელი აქტის, ახალი ევროპისთვის პარიზის ქარტიის მკაფიო შესრულებას.

უკრაინა ადასტურებს საერთაშორისოდ აღიარებულ საზღვრების ფარგლებში საქართველოს სუვერენიტეტისა და ტერიტორიულ მთლიანობის პატივისცემას და საერთაშორისო თანამეგობრობას მოუწოდებს არ დაუშვას ცხინვალის რეგიონისა და აფხაზეთის (საქართველო) ანექსია რუსეთის მიერ“, - ნათქვამია უკრაინის საგარეო საქმეთა სამინისტოს განცხადებაში.

ნინი კაციტაძე