საპარლამენტო უმრავლესობის წევრის თამარ კორძაიას თქმით, მთავრობამ ისე უნდა იმოქმედოს, რომ მისი პარლამენტში დაბარების სურვილი არავის ჰქონდეს.

ამის შესახებ კორძაიამ რიგგარეშე სხდომის მოწვევასთან დაკავშირებით ოპოზიციის მოთხოვნის საპასუხოდ განაცხადა.

„რიგგარეშე სესიაზე იქნება ეს მოსმენილი თუ - ისე, პრობლემა რეალურად ძალიან მწვავეა ქვეყანაში. ეს ეტყობა თითოეული მოქალაქის მდგომარეობას. ამიტომ მე ვფიქრობ, რომ საქართველოს მთავრობამ ისე უნდა იმოქმედოს, რომ არავის არ ჰქონდეს მისი დაბარებისა და შეკითხვების დასმის სურვილი. მან ყველაფერი უნდა გააკეთოს იმისთვის, რომ ლარის კურსი დასტაბილურდეს“, - განაცხადა კორძაიამ

შეგახსენებთ, პრეზიდენტს რიგგარეშე სხდომის მოწვევის თხოვნით „ნაციონალურმა მოძრაობამ“ მიმართა. თუმცა გუშინ გიორგი მარგველაშვილმა მთავრობის ეკონომიკური გუნდის მინისტრებთან შეხვედრის შემდეგ განაცხადა, რომ სხდომის მოწვევის საჭიროება ამ ეტაპზე არ არსებობს.

ნინი კაციტაძე